Taofiofi Moataa ma Magiagi i talita o le Soka

I le Aso Toonai na se‘i mavae atu nei, na faatautaia ai taaloga mulimuli o le vaiaso lona 17 o le Taamilosaga a le Faalapotopotoga Soka a Samoa. Na vaaia le faatumulia ai o le malae soka i le autapuai mai Moataa faapea ma Vaimoso.
E tolu ‘ai na manumalo ai Moataa ia Vaimoso i ‘ai e tasi. Na laasia muamua e Vaimoso le laina sikoa i le ‘afa muamua ae peitai e lē faavaivai ai le ‘au a tamatai mai Moataa. Na faaalia e le susuga ia Lenatai Levine, o ia o le Faauluuluga o le ‘au a Tamaitai mai Moataa, “o se tulaga uigaese lenei ua oo i ai lana ‘au,” ona o le taimi muamua lenei ua sosoo ai manumalo a le ‘au mai Moataa i le itu a tamaitai, ma e lei toe se‘ia lava le Talita mo vaiaso e fā (4) o le taamilosaga lenei.
O se fiafiaaga tele mo a‘u ona o loo vaaia pea le naunau o tamaitai o le ‘au e puipui le talita. Ma o se tulaga o le a faamausali ai le alualu i luma o taumafaiga a alo ma fanau o le atunuu i lenei faagatama o le soka.
Mo le itu o alii, e lei mafaia e le ‘au a Adidas mai Alamagoto ona se‘ia le talita mai le ‘au malosi o le Lupe o le Soaga mai Magiagi. O le taaloga i le va o nei ‘au e lua na manumalo ai le Lupe o le Soaga i ‘ai e 2 i le 1 a le Adidas.
O lea foi na taaalo le ‘au lava lea a Magiagi ma le ‘au a Vaivase-tai ma manumalo ai foi le Lupe o le Soaga i ‘ai lava ia e 2 i le 1 a Vaivase-tai ma ua tumau ai le talita ia Magiagi i le faagasologa lenei o lea taamilosaga.
O lenei taamilosaga na amatalia mai ia Setema i le tausaga ua mavae, ma o lona vaiaso 18 lenei. E 12 ‘au o loo tausinio i le itupa o alii, ae 11 ‘au mo tamatai. O le faaiuga o le masina e sailia ai le siamupini o lenei taamilosaga.
O le taaloga lenei ua vaaia le tumutumu i ai o le toatele ma ua avea le ta‘ape o nofoaga ua faatautaia ai le Taamilosaga o le Lakapi Iuni i lenei vaitaimi o le tausaga ma mafuaaga ua agai ai le toatele i le taaloga o le soka ma ua lē ‘asa se vaiaso ma vaaia le uta o pasi e agai i Tuanaimato i tapuaiga a le atunuu i lenei taamilosaga.
O le isi tulaga ua vaaia o polokalame faagasolo a le taaloga lenei e pei ona iai tausinioga a aoga tulagalua (Primary Schools) lea foi faato‘ā mae‘a atu se isi taamilosaga mo aoga umia tumaoti poo private schools, lea ua iai se fuafuaga o le a faaauau i tausaga taitasi.