Ua ave le poloaiga malosi a se tasi o alii Peresetene, o ia foi o se Sui Sinia o le Herbalife i Niu Sila, e lapataia ai le tamaitai Samoa ma se tasi o vaega o tagata mai Ausetalia, ua latou tatala faasolitulafono le auaunaga a le Herbalife i Samoa, e aunoa ma se silafia ma le mulimulitai i taiala ma aiaiga a le kamupani.
O le lapataiga ua faamatuuina e le alii Peresetene i Niu Sila, le susuga ia Sepiliano Paulo, e aofia ai le taofia o le lala ua faatuina i Tanugamanono i Apia, atoa ai ma le toe faaleaogāina o le fonotaga faalauaitele sa faia i le aso 16 o Iulai 2014.
O lea fonotaga faalauaitele sa faia i le aso 16 o le masina na tea nei o Iulai lea, ma sa faataunuuina lea i le fale talimalo o le Orators i Samoa lava. O lea fonotaga sa avea ai le Sui Palemia o le atunuu le afioga ia Fonotoe Nuafesili P Lauofo, ma sauoaga autu mo lea lava faamoemoe.
Sa faailoa manino e le susuga ia Sepi Paulo i le Samoa Times e faapea, o loo tālia i le taimi nei se faatagaga aloaia mai le pulega ma le ofisa autu o le Herbalife i Amerika, e mafai ai ona faatuina sona lala i Samoa. O lea foi tulaga, ua mae‘a ona logoina, ma faia i ai fesootaiga ma le Palemia o Samoa, le afioga Fatialofa Dr Tuilaepa Lupesoliai Sailele Malielegaoi.
Peitai o le tulai mai o lea faafitauli i nisi foi sui o le kamupani, ua iloa ai le osovale ma le fia iloa, ae aunoa ma se malamalama ma le iloa lelei o tulafono, taiala, ma aiaiga faataoto o loo limataitaiina ai tagata uma ma sui taitasi, e oo lava i atunuu uma o le lalolagi.
Saunoa Paulo, ua tatau i le tamaitai lea ma lana au na malaga i Samoa, ona taofia ma toe faaleaogaina faamatalaga uma, atoa ai ma le lala ua faatuina nei, ona e lē o tusa ai ma vaega e pei ona ta‘ua i luga. E iai itu ogaoga o lea gaioiga ua latou faia, ma o lona popolega tele lea ma lona manatu, e lē tatau ona tupu ma afaina ai pisinisi ma isi sui o le Herbalife, ua taitaiina sese e lea foi alo o le atunuu, ona o le vavevave ma le lē onosai i tuutuuga ma talanoaga ua mae‘a ona faia muamua.
Sa matuā faamanino e le susuga ia Sepi Paulo, e faapea, e lē mafai, lē mafai lava ona faia e se tasi o sui sinia e oo lava i le tulaga Peresetene, ona faia se fonotaga faalauaitele ma tagata lautele i auaunaga a le Herbalife, se‘i vaganā ua aloaia ma aumai se faatagaga e le faauluuluga ma le pulega o le kamupani i le lalolagi. O le ala foi lea o loo taofimau ai pea ma onosai mo le taimi nei, seia maua mai se ioega aloaia, ona logoina ai foi lea o le Palemia ma le malo i Samoa.
O le isi tulaga sa faamanino e Paulo e faapea, o tagatānuu o Niu Sila, Ausetalia, ma Amerika o loo alala i Samoa, o loo mafai lava ona latou faia a latou oka ma faaaogāina oloa a le Herbalife mo i latou lava.
O loo mafai foi ona faaaogāina Tutuila, Niu Sila, poo Ausetalia foi e oka ai a latou oloa o manomia. Afai foi e ofoina lea fesoasoani e ala i oloa mo latou aiga ma uo, o loo mafai lava ona faataunuuina lea tulaga, a o se faia o se fonotaga faalauaitele ma faasilasila ai le tatalaina o se lala, e matuā leai, leai lava lea, ma e lē faatagaina foi.
O se faasalaga e ono oo i ai se tasi e na te tataeina tulafono a le kamupani, e ono aveesea lona suafa mai le kamupani mo le olaga atoa e lē toe talia lava. E le gata i lea, e ono afaina ai ma le toatele o i latou, ma pisinisi i lalo ifo o le taitaiga a lē ua solitulafono, ma lē usitaia taiala tumau. O lipoti e faapea, ua fai foi si saoasaoa o le faaaogāina o oloa a le kamupani e le mamalu o le atunuu i Samoa, ma e leai se malosi e mafai ona taofia ai i latou mai le faaaogāina e tusa ma taiala ma tulafono.
O le faamoemoe foi lea ma le auga o aute o fuafuaga alualu mamao a le kamupani, ina ia fesoasoani ana oloa mo le soifua maloloina o soo se tagata i soo se vaega lava o le lalolagi, peitai ia faia ma tausisia pea tulafono ma taiala ua mae‘a ona faatulagaina. O le vaega tonu lea, o loo mafua ai le finagalo o le susuga ia Sepi Paulo, ina ia taofia ma faaleaogāina le fonotaga sa faia, ma le faalauiloaina o se lala ua faatuina i Samoa.
E le o toe mamao, ona aumai lea o le tali mai le ofisa autu o le Herbalife e tusa ai ma le tatalaina o Samoa. O le sitepu lava lea e tasi, o loo faagaioia ma faagasolo ai fuafuaga a le kamupani, mo le faatutuina o ona ofisa i atunuu uma o le lalolagi. E sili le onosai pea mo le taimi tonu ma le taimi sa‘o e faataunuu ai lea moemitiga tāua mo tagata Samoa i Samoa, ae lē o le soona oso vale, ma le taumafai e ui i auala faaalatua e lē manuia ai.
O loo tatalo le alii Peresetene, ina ia mafai ona amanaia ma ia maua e le tamaitai mai Ausetalia le loto maualalo, e onosai ai le lapataiga ua avatu i ai, ma lona faamoemoe o le a mafai lava ona galulue faatasi, pe a onosai pea mo le taimi nei, ma talia se fautuaga ua faamatuuina i ai, atoa ai ma le aumai o le faaiuga aloaia mai le nofoaga autu o le Herbalife.
