O le aso ananafi a o faaauau ai felafolafoaiga a sui a faipule o le Palemene i Tiafau, na laga ai e le sui o Siumu, le tofa Tuuu Anasii le mataupu e pei ona pasia ai le tulafono ua faafaigofie ai le ofi atu o tamaitai e umia tofi faipule o le Palemene o Samoa.
O se mataupu na agai i ai Tuuu Anasii ma ia faaalia ai e iai tamaitai o le a upuia ona o le faigofie ona ofi atu e aunoa ma le palota i ai o le itumalo. Na faatusa ai e le alii faipule sui o le Maota fono o Samoa o le a sao atu i nofoa nei o se fasipusi ae ua lē pusi atoa.
O se lafoga na tulai le tamaitai minisita o le Matagaluega o Faamasinoga, le Afioga Fiame Naomi Mataafa ma ia saunoa e tatau ona aveese mai i faamaumauga a le Palemene ona ua “lē mafaufau tele”.
Toe tu i luga le alii faipule o Siumu ma faapea mai e lē iloa poo le ā le leaga o dxlana faamatalaga ma e lē tatau i le tamaitai Minisita ona faauiga sese fua lana tala ua lafo, ona toe faaopoopo atu foi lea o Tuuu Anasii ma faapea atu, e ese le faauigaga o le fasipusi e le tamaitai minisita, ese lana foi faauigaga ma na vave ai loa ona faauilavea le alii Fofoga Fetalai, le susuga Laauli Leuatea Polataivao ma faapea mai e taofi ia ituaiga lafoga ma e leai ma se fesootaiga i le mataupu lea na laga e le alii faipule.
E ui ua pasia nei le faiga fou lenei e mafai ai e sui tamaitai ona tamomoe i se isi auala e ese mai i le auala masani o le malo i faigapalota a itumalo poo faigapalota taitoatasi, e toatele lava nisi sui faipule alii ua faaali i ai lo latou tetee ona ua manatu o lea la ua fai mea faapito le Malo i tamaitai ona ua faafaigofie atu lo latou ofi atu i le maota fono faitulafono a Samoa. Peitai o le tasi lenei o vaega o le ausia e Samoa o Manulauti o le Meleniuma, o le sii o le numera o tamaitai e ofi atu i totonu o le Palemene.
O se atugaluga ua laga faafia e Malo Aufaatasi ona o le finagalo, a fuafua atu i le faitau aofai o tagata Samoa, e matuā laitiiti tele le numera o tamaitai ua seei i nofoa o le Palemene.
O Samoa, Papua Niu Kini, le atu Solomona ma isi atumotu o le Pasefika ia ua faapea ona iai laasaga ua o latou savalia e ala i teuteuga o a latou tulafono ina ia tali atu i le manaoga o Malo Aufaatasi ina ia siitia le numera o tamaitai faipule.
O le isi la faigapalota o loma nei a le atunuu o le a iloa ai pe tele se suiga o le a iai le toalua o tamaitai faipule ia e i le Palemene i le taimi lenei, lea e aofia ai le tamaitai Minisita e toatasi, le Afioga Fiame Naomi Mataafa ma le isi tamaitai faipule – le Afioga Gatoloaifaana Amataga Alesana Gidlow o Faasaleleaga Numera Tasi.
E ui o lea na ta‘ua e le Afioga Fiame i finauga o lenei vaiaso, e lē fetaui tele faamatalaga a le alii faipule lea ua fai ma e tatau ona aveese ma faamaumauga a le Palemene.
