Talu mai le tausaga e 2008, e $2 miliona tala Samoa ua faamatuu mai e le Malo, o se tinoitupe mai i atunuu i fafo, ona o le taumafaiga o se polokalame e ofo atu ai tupe mo nonogatupe a tina o Komiti a Tina ma Tamaitai i totonu o afioaga o Upolu ma Savaii.
O se polokalame na galulue faatasi ai le Malo e ala i le Ofisa o Tupe, e faamatuu atu loa i le Faletupe o Atina‘e ma le Matagaluega o Tina ma Tamaitai, Atina‘e o Nuu ma Aga Fesootai.
O le tuutuuga o le faatinoga o ia nonogatupe e agai atu komiti o tina, i ona sui e amata atu le toatele i le toalima agai i luga, ona fai lea o le talosaga e agai i le Faletupe o Atina‘e.
O talosaga e talia e mo atina‘e a tina e pei o togalaau aina, o fale su‘isu‘i ma isi lava ituaiga atina‘e e mafai ona galulue faatasi ai tamaitai.
E fai lava le nonogatupe a le tagata ae e faamaonia e le isi tina le atina‘e a le isi tina.
O lea faiga na ta‘ua e le Faletupe o Atina‘e e mautinoa ai le galulue faatasi o tamaitai, ma faamalosi ai le isi tamaitai i le isi i le taimi e totogi ai nonogatupe nei i masina taitasi.
O le amataga o le taumafaiga e 19 afioaga sa talia le faatautaia ai o lenei taumafaiga.
O le taumafaiga lava ia i lona amataga na iloga le tulai mai o tamaitai, ma na agai lelei lava foi peitai na amata ona faamaamulu nisi ma ua tapunia foi nisi o komiti ua lē toe faaauau i totonu o afioaga ma galoma atu ai lava ma le totogiga o aitalafu poo nonoga tupe nei sa fai i le Faletupe o Atina‘e.
Faaalia e le sui o le Faletupe o Atina‘e o Samoa sa nafa ma le faasoaina o nei seleni, o Eseta Fofoa Saena, o le faatamala lava o tina i le totogiga o a latou nonogatupe lea ua sau ai loa ma le faatonuga e motusia lea foi fesoasoani na tuuina atu mo i latou.
“Mo Upolu lava ia e lē aofia ai Savaii, e $162,000 sa tatau ona aumai i totonu i le masina o Tesema o le tausaga na tea nei, ae peitai e lei totogia mai le tele o aitalafu,” o se saunoaga lea a Eseta.
Na ia ta‘ua foi, e toatele tina ua ave i le tulafono ona o le lē usitaia o le taulogologo a le Faletupe mo le totogiina mai o a latou nonogatupe.
O se tasi o tina mai le afioaga o Saoluafata, na ta‘ua e Eseta na oo i ai leoleo i le vaiaso na te’a nei ona o le lē usitaia o se faaiuga a le tulafono ma ua taatia lea mataupu i le Matagaluega o leoleo mo suesuega.
O se tasi o faafitauli na tulai mai i le faaiuga o le tausaga na tea nei i le faagasologa o lea polokalame, o le faatinoga o le galuega a le faletupe i luga o le taavale ma le auala a le Malo ona ua lē tatalaina e le Komiti a Fusi Safata le pa o le latou Fale komiti e ao ai aitalafu.
Na faaalia le lē fiafia o le tamaitai o Eseta i lea tulaga na tulai mai ma na ia saunoa e toatele o loo manatu māmā i ai ae peitai e lei tauanaua e le faletupe lea tulaga, o i latou lava na talosaga mo lea fesoasoani.
E to‘a 628 tina mai afioaga e 19 na amata ai lea polokalame (MFF) i Upolu e ese mai ai afioaga ma sui na talosaga mai Salafai.
Ina ua tulai mai le mala faalenatura poo le tsunami i le 2009 na aafia ai le afioaga o Saleapaga ma ua lē toe auai ai i lea polokalame na faamagalo e le Faletupe a latou nonogatupe ona o le faalavelave na aafia ai.
Mai i afioaga e 18 ma sui e 596 na totoe mai ina ua lē toe auai Saleapaga, e na o le 50% o i latou ua mae‘a ona totogi aitalafu.
E 300 tina mai afioaga e 15 o loo totoe nei ma o loo auai pea i lenei fesoasoani i le taimi nei, ma o le 216 o lenei 300 sui, o loo aafia pea i aitalafu e lei mae‘a ona totogi se‘i vaganā ai tina e to‘a 84 o loo gasolo lelei pea le totogiina o a latou aitalafu.
O le a faia foi le fonotaga amata mo sui tamaitai o nuu i Salafai ma sui o le Faletupe o le Atina‘e ma le Matagaluega o Tina ma Tamaitai e talanoaina ai foi tulaga faaletonu ua iai nei le faagasologa o lea polokalame.
E tali tutusa lava le polokalame lenei ma le polokalame o atina‘e tau pisinisi laiti a le Pasefika le SPBD lea foi o loo faagasolo lava e oo mai i le taimi lenei ma o se polokalame ua tele foi faafitauli faapea, ae o loo vaaia le malosi tele i le taimi lenei ma e faitau afe ma afe tina o Samoa o loo auai ai pea.
E foliga mai o le manaoga tele lava foi o le malosi o le unai ma le mulimulitaia o le totogiina o aitalafu auā o le SPBD e toatele ona sui o loo agai atu i afioaga i masina uma ae e toaititi le aufaigaluega a le Faletupe o Atina‘e e faia lea galuega. Atonu o le mafuaaga lea ua faamaamulu gofie ai foi ma tamaitai nei o loo iai aitalafu i lalo o lenei polokalame.
