E ui e lei mafai ona tuuina mai se faamatalaga aloaia mai le komiti faatonu a Toeaina ole Ekalesia Faapotopotoga Kerisiano Samoa (EFKS) i tuua‘iga faapea ua latou tapu le susuga ia Opapo Oreti ona toe talanoa mai i tusitala male aufaasalalau ile mataupu lea e tulai mai i lona afafine o Toaipuapuaga, ae ua faamaonia mai e nisi ole ekalesia ile tatou nusipepa le moni o lea tapu.
E lei fia talanoa tuusa‘o lē na tuuina mai le faamatalaga, ae na ia ta‘ua, ole manaoga ale autoeaina, ia aua ne‘i toe talanoa mai le susuga ia Opapo e tusa ai ma faaaliga ma vavega ia e vaai iai lona afafine.
Ose tapu na faaalia e nisi ole ekalesia, e lē faavaea tele ona sa tatau ona talisapaia ma suesue le moni o nei faaaliga, ae lei faia se faaiuga. Ua mae‘a ona tali mai taitai ole ekalesia Katoliko i nei faaaliga, ma ua latou taliaina foi, e na ole ekalesia Katoliko e masani ona tupu ai vaaiga nei, lea e ta‘ua faaperetania ole Stigmata. Oloo tālia foi ele ekalesia se tali mai ale EFKS e tusa ai male talosaga na tuuina atu iai mo ofu sa ofuina e Toa ile taimi na tutupu ai ia faaaliga ia te ia, e ave ile Vatikana i Roma mo suesuega.
Ina ua tulai mai vavega ma faaaliga ile masina o Aperila 2016 ile EFKS i Siufaga Falelatai, na molimauina ai se vaaiga uigaese ina ua toto mai lima, vae, le muaulu male itutino ole tamaitai o Toa, i manu‘a e pei ona manu‘a ai le alii Faaola ia Iesu Keriso.
Ole taimi lava na iloa ai ia faaliga, ole taimi foi lea na tulai mai ai le ekalesia Katoliko ma aputi atu lea tamaitai, ona ole talitonuga, o manu‘a lava ia o Iesu, lea ua aliali mai ile tino ole tamaitai o Toa.
Na amata mai ai foi i lea lava taimi ona palasi mai talosaga mai le toatele o faalapotopotoga ma ekalesia mo Toa, ina ia faatasi atu ia latou mafutaga. Sa talia ele tamaitai ia talosaga ma sa autovaa atu lava iai, e oo lava i Tutuila ma Niu Sila. Ole tele lava o taimi, e talanoa faatasi ai Toa ma lona tamā o Opapo ma tusitala, peitai sa iai le taimi na faapea mai ai Opapo ua faaali mai le faaaliga ia Toa, e aua ne‘i toe talanoa i tusitala, ma ole mafuaaga lea na ala ai ona talanoa mai na o Opapo ile autusitala.
