Tamua le faleoloa Saina ia Afega

Ole maketi i Afega ile aso na tatalaina ai, lea ua vaeluaina nei, faaaogā le isi afa ole Maketi mo se faleoloa, e pei ona malo ai nei se pisinisi Saina ile tauofoga
Ole maketi i Afega ile aso na tatalaina ai, lea ua vaeluaina nei, faaaogā le isi afa ole Maketi mo se faleoloa, e pei ona malo ai nei se pisinisi Saina ile tauofoga

Ua tamua ai nei le kamupani Saina ole au faipisinisi mai fafo e faataunuu le miti a tamafanau o aso nei ale afioaga o Afega.

Ose vaega o lea miti ole faataga lea ona faia oni faleoloa o aiga poo ana tamafanau ina ia atinae ai le nuu i lona agaigai i luma.

Peitai, ua molimauina ai le vaeluaina ai nei ole maketi ale aufaifaatoaga o Afega, ina ia faia ai le faleoloa o Saina i lana Best Value Market (maketi).

Na saunoa ai le afioga ile Pulenuu, Fata Saifoloi, ole manaoga o lea itu ole nuu ina ia maua se fesoasoani vave e totogi ai le aitalafu tupe ale nuu mo le latou faleaoga ole kolisi o Sagaga.

Sa faaaitalafu lea galuega tele mai le Blue Bird, peitai ole taimi nei ua faasee atu se vaega o totoe ole aitalafu ile Faletupe o Atinae le Development Bank e faigofie ai ona togitogi.

Manumalo le pisinisi Saina ile tauofoga

Na manumalo le kamupani Saina ile maketi ole Best Value Market ile tauofoga na faia faalauaitele mo se pisinisi e nate lisiina le maketi ale au faifaatoaga ma le aufaifaiva o Afega.

Ole maketi lea ua faitau tausaga nei talu ona tatala ma mapu ane iai le tele ole aufaatau o meamata ma fulaaau mata mai le itu atu i Sisifo ole motu nei o Upolu, ona ole taumamao mai ole maketi tele ile taulaga i Apia. Sa avea foi ma faamalosiau ile aufaifaatoaga ole itumalo. Peitai e lei atoa se tausaga talu ona atoatoa le malosi o lea maketi, ina ua molimauina le faasolosolo ifo lava ina faaitiitia meamata e maua, ma faaleai ni faifaatoaga e latou te faaaogāina.

Ma toe iu mai ai lava ina gasolo mai ile maketi i Apia le mamalu ole atunuu mai Sisifo e faatau atu oloa e pei o fualaau faisua, talo, popo, fafie ma isi.

E ui ina oloo faaauau lava ona maua uma na oloa ile maketi i Afega, ae ua faaitiitia foi lona aofaiga. Sa tua iai faatauga i taimi e malotia ai Ekalesia, e pei o fono tetele ale EFKS, o Metotisi ma le Katoliko, ae o faalavelave o aiga i afioaga lalata ane iai.

Ile taimi nei, ua tele lava se suiga i foliga vaaia, e oo lava ile afa ole maketi o faaaogā e le aufaifaatoaga, oloo faaauau lava ona avanoa le ‘afa pito i tua.

Na saunoa ai le afioga ile Pulenuu ia Fata Saifoloi, ole isi lea mafuaaga ole tauofo atu ole maketi e sailia ai ni tupe mo mea fai ale nuu, ma avatu ai le faatuatuaga ile kamupani Saina na manumalo, ile avanoa ile Best Value maketi.

Ua maua mai ai le $10afe tala ile masina ole latou lisi, e totogi ai le aitalafu ole faleaoga ile Faletupe o Atinae.

Toe lalaga le Falemai faaitumalo i Afega

Ua taatia atu ai nei le finagalo ole afioaga o Afega ile malo, aemaise ole matagaluega ale Soifua Maloloina, mo le toe faatuina lea ose falemai faaitumalo i totonu ole nuu.

Ua tele tausaga talu ona tapunia lea auaunaga ile nuu ina ua le toe saogalemu le falemai faaitumalo na iai. Lea na tu tonu lava ile fanua o iai nei le maketi pei ona ta’ua i luga.

Ole isi lea atinae ale afioaga ua faasolosolo atu lava iai polokalame faasolo ale afioaga. Talu ai ua le toe pasia e le malo le nofoaga tuai, i vaega talafatai ole nuu mo se falemai faaitumalo, e pei ona saunoa Fata Saifoloi.

Ole laasaga lena lea oloo faatali nei iai lo latou nuu, ole feutanaiga lea ile fanua e faatū ai lona falemai faaitumalo. Ae mo le taimi nei oloo agai uma lava le mamalu ole itumalo ile falemai tele ole Tupua Tamasese Meaole i Motootua.

Ole isi falemai faaitumalo ile itu atu lea i Sisifo e aofia ai Leulumoega ma Satapuala. O isi atinaega ole nuu e pei ona saunoa lona Pulenuu, e le gata i itu tau ile saogalemu, ae o aoaoga, ma le soifua maloloina, o lona tamaoaiga, e pei ona unaia ai le aufaifaatoaga ma pisinisi lea ua tatala ai le tapu ale nuu ua leva.

Ile gataifale, ua faia lona faasao ile taimi nei i amu, talu ai e le o mafai ona faafailele ai se faisua poo se maso, talu ai vaitafe oloo tafe atu ile nuu i ona itu uma e lua, lea e le o ola lelei ai na ituaiga o figota i gatai o Afega e pei ona talanoa Fata. “Ae ole taimi nei oloo atinae le laueleele ae se’i faatalitali le toe faaolaolaina ole faasao o amu ole gataifale.”