Tamaoaiga aiga Fagalii i pisinisi laiti a tina

Matamua Lapa Leatioo fofoga o le po, Tina faipisini laiti Fagalii ma le tofa ia Su’a
Matamua Lapa Leatioo fofoga o le po, Tina faipisini laiti Fagalii ma le tofa ia Su’a

O le malaga mai ai o tina faipisinisi laiti a le afioaga o Fagalii e faailoa a latou pisinisi i totonu o Aukilani, ua maitauina ai ose tasi lea galuega poo le pitolaau a tina ua fesoasoani malosi tele ile atinaeina o aiga, nuu ma le Ekalesia.

Ua faailoa mai ai foi ile malaga mai o nei tina oloo iai lava galuega ma le taleni oloo i totonu o le siosiomaga o aiga e maua ai nisi tupe e fesoasaoni i meafai i totonu o le atunuu e ese mai i galuega oloo galulue ai tagata lautele, ma vaaia ua tamaoaiga ai aiga i galuega a tina Fagalii i lenei polokalame.

Auā foi e faatāuaina tele e tina le tausiga o aiga, ua lē gata ile faaaoogaina o le fanau a‘o aiga foi oloo tautuaina Ekalesia.

O le afiafi o le Aso Tofi, 14 o Iulai na felanulanuai vaaiga eseese i totonu o le hall a le kalapu lakapi a Otahuhu i pisinisi a tina Fagalii na malaga mai ma latou e faailoa i tagata Aukilani le tele o le poto ma le malamalama ua maua e tina e su‘i ai le pulou, e fai ai le elei mo lavalava, fai ai le ato faatasi ai ma le su‘iina o lavalava i soo se ituaiga sikaili. E maofa le silasila a le mamalu o le atunuu sa tumutumu ai i lea po ma molimauina lea faamoemoe ile matagofie o le taumafaiga a tina mai lea afioaga.

O tina faipisinisi laiti a Fagalii na siamupini i Samoa i le tauvaga a tina faipisinisi laiti i lenei tausaga i lalo o le polokalame ale SPBD South Pacific Business Development ma latou mauaina ai le talita ma le tino i tupe e $2000.00, ma ose fiafiaga na lagona ai le loto faafetai o le afioga ile peresetene ia Falefia Togafau ma tina laiti o lenei afioaga, ma taupulepule ai loa le malaga mo Niu Sila e tafafao mai ai, mai le tele o galuega sa faatino.

O le tāua la o lenei malaga, ua lē gata ina tafafao mai ai tina, ae o le faailoaina foi o le latou polokalame e ala lea i pisinisi laiti oloo faia i totonu o aiga mo tagata Samoa oloo i atunuu i fafo, ae ua faamanatu ai foi le atoaga o le 16 tausaga talu ona auai i totonu o lenei polokalame i Samoa.  Ose po fiafia tele i tagata o aiga, uo ma ē masani ua feiloai ai ma aiga na malaga mai Samoa, ae sili ai le fiafia o tina mai Fagalii ua feula ai le keke o le atoaga o le 16 tausaga talu ona auai i le polokalame lenei a le SPBD i Samoa. O le afioga ia Vaiolo Lapa Vaueli sa fai ma fofoga o le po, ma sa faailoa foi le valevale alofa ma le lima foai o le mamalu o le atunuu e ala i siva Samoa e tauala i nisi o le aumalaga aemaise ai o nisi o foai sa tauaaoina.

Sa faapea foi ona tali mai tina o le malaga mai Samoa ma faimeaalofa i nisi o tamā ma tina matutua sa auai faapea nisi o aiga e ala ia latou meataulima sa aumai i Samoa.

O le saunoaga a le peresetene ia Falefia Togafau, e lei faigofie ona latou amataina lenei polokalame i totonu o le afioaga, auā e leai ni metotia sa ia i latou e amata ai le pisinisi, aepeitai ane, ua tilotilo pea ma vaavaai ma taumafai e aumai nisi o tina e faasoa mai le taleni ia latou, na mafua ai ona faailoa atu i nisi o tina o le nuu ma mafai ai loa ona faatino le polokalame i totonu o Fagalii.

Ma o le vaaiga sili ona tāua ua agai i luma le mafutaga ma ua faafiafiaina ai foi tina ua maua ai tupe, e pei o taimi e lei iai ni faigaluega, auā o le tāua lea o le polokalame a le SPBD e faapitoa mo tina e lē o faigaluega ina ia aveesea ai le paie ma le faapalapala.

O le SPBD South Pacific Business Development o se polokalame e nonō mai ai tupe e faatino ai galuega a tina i tua i nuu taitasi, ma ua maua ai foi galuega a tina nofo fale. E Au le Inailau a Tamaitai.