O se tasi o matata ua tele ina sailimalo agai i ai le paia lautele o nai o tatou tagata i le aai o Melepone, o le faia lea ma amataina o pisinisi e vaaia ai alo ma fanauiti a o faigaluega o latou mātua.
O se galuega ua tele ona lavelave ma ua tele foi tagata mai atunuu eseese ua oo i le tulafono ona o le lē uia o ala tatau e tusa ma le tulafono, o le mafuaga foi lea o le taulamua o nai o tatou tagata Pasefika e logopuialii le mamalu o fia galue i lea matagaluega, ina ia uia ma mulimulitaia ala o le tulafono, ona lē tulituliloaina lea o oe e le tulafono.
O se tasi la o faatinoga ua taulamua ai le mamalu o tagata Samoa, o le faia lea o aoga e saili ai tusipasi mo i latou o fia ofi atu ma amataina lea foi matata.
O nai vaiaso la ua tuanai atu na faaiuina ai le tasi o aoga faapenei ma e to‘a fasefulu ma le fā i latou ua faamanuiaina mo o latou tipiloma (diploma) o le a mafai ai loa ona amataina lana lava pisinisi ma faigaluega ai loa.
Na matuā faatumuina lea afiafi i aiga ma uo, o nisi foi o sui o ekalesia ma matagaluega eseese, e patipatia ma faamanuia atu aemaise o se faamalo i aoaoga ma sailiiliga fita i tuga sa feagai ai. O se luitau i nisi ona o le gagana faa-Peretania, peitai viia le alofa ma le agalelei o le Atua, auā e leai se mea e faigata i lana afio, pe a ‘au ma i tatou.
Malo le tau malo le finau, o lena ua faaeaina ma faamanuiaina. Manuia laasaga uma o alo ma fanau o le a outou faafaileleina ma a‘otauina.
