Ile toe valaauina ole mataupu faasaga ile Komesina o leoleo oloo faamalolo lē tumau ile taimi nei, Fuiavailili Eagon Keil, na talosagaina ai ele loia oloo tulai mole Komesina ina ia soloia moliaga ua faia faasaga ile Komesina o leoleo.
E lua mafuaaga na faavae ai le talosaga ale loia, Komisi Koria ole mafuaaga muamua e lē o lava ni molimau e lagolagoina ai moliaga, ole mafuaaga lona lua e lē o mafai ele Itu tagi poo le Ofisa e suesueina moliaga tau solitulafono, poo le National Prosecution Office (NPO), ona tuuina atu ile Itu ale Komesina faamatalaga tonu e faatatau i moliaga oloo faia faasaga ile Komesina o leoleo.
Na faaalia foi e Koria le tulaga lē talafeagai ile toe tulai ole tamaitai loia o Muriel Lui ole sui pule ole National Prosecution Office, e finauina moliaga faasaga ile alii Komesina, meaane o suesuega na faia e leoleo na afua ai moliaga o le Komesina, na faatonuina lea ele NPO.
Na finau foi Koria, e matuai leai se aiā faaletulafono a Muriel Lui e faatino ai suesuega faasaga ile Komesina o leoleo, aunoa mase faatagana mai lona pule, Mua Precious Chan o loo faamalolo le tumau foi ile taimi nei e faatali ai le taimi e valaauina ai ona moliaga tau taavale afi.
Na sauno foi Koria i luma o le faamasinoga, e matua leai se avanoa e mafai ai suesue ma faaulu moliaga e le NPO ae toe tulai foi le Sui Pule o le NPO e finauina le mataupu.
E 14 leoleo na valaauina e molimau faasaga ile alii Komesina, mai le 14 o leoleo na ole toatasi lava le leoleo sa molimau sa‘o i moliaga faasaga ile Komesina o leoleo. Na finau foi Koria ina ia tausisia le amiotonu, ole mataupu e tatau ona finauina ese loia tuma‘oti, ma ia lagolagoina ai le faaiuga ale Loia Sili, e saili atu ni loia tuma‘oti e finauina moliaga faasaga ile Komesina.
Na tapa foi e Koria se faamalamalamaga i moliaga ole Komeasina ona oloo faaupu mai, e lona lua iai tagata molia (secondary offender), peitai, e lē o faamanino maia poo ai la oloo muamua iai moliaga. Na ia ta‘ua foi, ole aiā tatau ale Komesina i lalo ole faavae, le tuuina uma atu ele Itu tagi ole faamatagala atoa o moliaga faasaga ile Komesina, peitai, e lē ole tulaga lea o iai.
Peitai na faaalia e Muriel Lui oloo tulai mole NPO, e tatau ona taatia pea le mataupu ile faamasinoga. E lē gata i lea, na ia talosagaina le alii faamasino e tatau ona tuuina atu se poloaiga ile Komesina o leoleo e faasā ai ona toe fesootai i leoleo male matagaluega.
Na saunoa le alii faamasino Justice Lesatele Rapi Vaai, ma ia faamanatu ile tamaitai loia, ole Komesina o leoleo ua faamalolo lē tumau mai lana galuega, peitai, na finau pea le tamaitai loia Muriel Lui, e tusa lava pe ua faamalolo le Komesina, oloo iai pea lona malosiaga e taa‘ina ai leoleo. Na teena ele faamasino le talosaga ale NPO mo se poloaiga e taofia ai le Komesina ona toe fesootai i leoleo, ma ua ia atofa le Aso Lulu 14 Setema e fofogaina ai le talosaga ale itu ale Komesina, e soloia ai moliaga faasolitulafono ua faia faasaga ia te ia.
