Talosagaina e soloia moliaga ole Minisita

Le afioga ile Minisita o Faamasinoga, Faaolesa Katopau Ainuu ma lona faletua a‘o auai ile sauniga ole faamanatuina ole Tutoatasi o Samoa ile aso muamua o Iuni 2016
Le afioga ile Minisita o Faamasinoga, Faaolesa Katopau Ainuu ma lona faletua a‘o auai ile sauniga ole faamanatuina ole Tutoatasi o Samoa ile aso muamua o Iuni 2016

Ole moliaga ole gaoi, ma le faia o ni gaioiga faaalatua oloo tuua‘ia ai le afioga Faaolesa Katopau Ainuu ua avea nei ma faipule ole paeaiga fou ale Palemene o Samoa na filifilia mai le palota tele ole masina o Mati o lenei tausaga 2016.

Ua avea ai ma Minisita ole Kapeneta mo le Matagaluega o Faamasinoga ma mataupu tau Faamasinoga. O moliaga ua ta‘ua oloo taoto ile faamasinoga maualuga i Amerika Samoa ma sa molia ai le alii minisita a‘o faamautu ai i Amerika Samoa ini tausaga ua tuanai ma galue ai ose loia.

Ole vaiaso ua mavae atu nei na faaulu ai se talosaga oloo tauaveina ese loia i Amerika Samoa ua finauina ai le faaleaoga male soloia ole tusi saisai oloo taoto ile faamasinoga i totonu ole faamasinoga ale Teritori, ina ua lē oo atu le afioga Faaolesa Katopau e tali i moliaga faasolitulafono.

Ile talosaga ua taoto nei ile faamasinoga mose faaiuga oloo finau ai le loia ale minisita e faapea, ole tausaga na tea nei na maliu ai le tagata na faauluina le tagi i leoleo a Amerika Samoa faasaga ile minisita, ile taimi oloo nofo ma faamautu o ia i Tutuila ma galue ai faaloia. Ua faailoa foi ile talosaga e lē o manao le toalua poo le avā a lē ua maliu na faia le tagi e toe faaauau le tagi ile faamasinoga.

Ua faaalia foi ele loia ile talosaga e leai se silafia o Faaolesa o faia se suesuega a leoleo ini tuua‘iga faasaga ia te ia, e oo foi i sona silafia ise tusi saisai poo se warrant of arrest o sailia ai o ia e leoleo.

Oloo tuua‘ia e lē na faauluina le tagi e faapea sa ia totogi se tinoitupe e lima afe ($5,000) tala tupe Amerika ia Faaolesa Katopau a‘o galue ai ose loia i Tutuila.

O lea tupe o le totogi mo le tuuina atu ose mataupu ile faamasinoga ale Teritori, peitai e faapea na tuua e Faaolesa Amerika Samoa ma faasee mai e faamautu i Samoa ma ua le faia ai lona tiute e tusa o aiaiga ma tuutuuga o galuega faaloia, mo le tagi sa ia tauaveina.

O le tusi saisai na sailia ai le alii minisita na faatoa maua iai sona silafia, ina ua salalau lipoti i lea tulaga.

O le tausaga e 2008 na faia ai e leoleo a Amerika Samoa moliaga, ma ua valu ai nei tausaga talu ona faatino lea tulaga.

Sa oo se talosaga ile ofisa ole Minisita mose avanoa e fesiligia ai ile mataupu ua aafia ai. Ole tala mai lana failautusi ua lelei, peitai e oo mai lava ina tuuina atu lenei lipoti mole faasalalauina e lei toe maua se fesootaiga ma lana failautusi poo afea e maua ai se avanoa ole tusitala.

Ua nao nisi lipoti oloo faaalia ai ele minisita o Faamasinoga, oloo ia teena tuua‘iga ua faia faasaga ia te ia, ma ose taimi ona maua lea ole faaamaninoga ole mataupu pe a maea sana taumafaiga e ala ise loia ole a finauina lana itu.

Ole vaiaso nei e pei ona faailoa mai ese molimau i Amerika Samoa ole a fofogaina ma suesue ai le talosaga a Faaolesa Katopau Ainuu ua taoto nei ile faamasinoga maualuga a Amerika Samoa.