O le vaiaso talu ai na vaaia ai i Ausetalia le taunuu manuia mai o se folauga muamua a ni vaa se tolu mai le Pasefika i ona fausaga faaanamua ma se feau i atunuu tamaoaiga o le lalolagi ia amanaia ma fuafua lelei le faaleagaina o le afuafu o le vanimonimo poo le osone ia latou kesi oona lea ua afaina ai suiga matuia o le tau (climate change). O nei suiga ua vaaia pea le tetele ai o afā malolosi, lologa, magoto ifo o atumotu maualalalo i le siisii o le suasami aemaise isi aafiaga.
O le vaa o Samoa le Gaualofa e toavalu na malaga mai ai ma sui o Toga lea na uluai taunuu i le Gold Coast ma faafeiloai ai e le mamalu o le Pasefika ma taitai o pitonuu tetele o Ausetalia a o lei faaauau mai i Sini.
E taitoa sefuluono sui o auvaa nei e tolu, ma o se avanoa lelei sa toe fafagu ai le faaaogāina o metotia ma le tomai na femalagaai ai tuaa anamua mai lea atumotu i lea nuu. Ua atagia ai foi le faalauaitele ai o le soifua aoaoina o tupulaga i Ausetalia nei i le agavaa uigaese sa iai i o tatou tuaa i aso ua tea.
O taitai o Malo o le Atu Kuki, Palau ma Kiripati na malaga faatasi mai i le vae faaiu o lenei malaga ua atoa le 3 vaiaso o folau mai le Pasefika. O le sini o le aumalaga ia maua se avanoa e silasila ifo ai taitai o le lalolagi o loo fono i Perisipeni i Kuiniselani e utagia mai ai la latou talosaga ia faaitiitia le faaleagaina o le vanimonimo ma le ea.
E le gata i lea na o latou molimauina foi le anoanoai o le lapisi (plastics) o loo ufitia ai isi vaega sami o le Pasefika a folau mai auvaa o le MUA. E toavalu sui mai Samoa ma o le taunuu mai foi i Sini na faafeiloaia ai e le Komiti sa faauluuluina i le alii Fomai Dr Paniani Patu ma le faletua ia Minerva aemaise le tali faaaloalo na faafeiloaia ai e le afioga Patele Molesi Thompson.O le po o le Aso Lua o le a faatautaia ai foi se aiavā ma faamavae atu ai mo le vaa o le Gaualofa na malaga mai ma isi vaa, auā le toe taliu atu ma le feau ua taunuu mai i le vaitau o le fonotaga tele a le G20 faapea le Parks Convention i Sini lea e talanoaina ai itu nei o tulafono ma aiaiga mo le faasao o le siosiomaga o le lalolagi.
