Ole fesili tele lea e lē taumate oloo fesiligia ai le pulega ma faiaoga ole Iunivesite NUS ile Papaigalagala, pe faapefea ona faapasi se tamaitiiti poo se teneitiiti aoga ae lei sue ile suega. Ua lē tasi pe lua tamaiti aoga ua tulai mai ai lea mataupu. Ole faia o talosaga ina ia faapasi poo le talosaga foi mo le faia ose suega faapitoa.
Ile faamatalaga ale paaga valalata ale Tusitala mai le NUS, sa toe fono faiaoga, e faatalanoa ai ia talosaga. A uma ona ave lea ole latou faaiuga ile pulega ole NUS mo le latou faaiuga. Ole manatu na fulisia iai le fono a faiaoga, ise faaiuga ole latou fono e faatatau i sea ituaiga o talosaga e faapasi, ole toe tuu iai ole avanoa e sue ai ile tausaga o lumanai. Peitai e lē ole tulaga lea na oo iai se tasi o nei mataupu, ina ua oo atu ile pulega.
O mafuaaga e afua ai nei ituaiga o talosaga mo le faapasi ae lei sue, ona e faapea na maliu tonu ai se tasi e latalata tele iai le tagata aoga lea. Ile faamaumauga ale paaga ale tusitala mai le NUS, e alu le taimi e toe fono ai ma talanoa faiaoga e faatatau ile togafiti ose talosaga ua taunuu. Ae a uma atu lava le fono a faiaoga e teena le talosaga, ae lē o ogatusa ma le faaiuga ale pulega, e faapena ai lava ona taoto lena mataupu.
Ile tala ale tasi o faiaoga ole NUS oloo taofia lona suafa, e tau talatuu mai le tamaitiiti aoga e avatu lana talosaga i totonu mo se suega faapitoa (special exam). Aua e ui ina ole a toe tuu iai le avanoa e fai ai lana suega ile tausaga lenei, ae ole amiotonu lava lea nai lo le talosaga atu ina ia faapasi ae lei sue.
Ole masina o Aperila 2017 lea ua tuu iai le faauuga ale Iunivesite mo le au fai Tikeri. Peitai ole faauga mo le Foundation le vaiaso fou. Ole tausaga talu ai na amata ai ona sui le faaaogā ole score system mo tamaiti, e faaopoopo uma ai togi o mataupu ona maua ai lea ole score.
Ole tausaga fou lea e amata ai le faiga fou mo le Aoga Faafaiaoga, FOE. Sa masani mai ai lava e maualalo lava points na talia ai tamaiti e ulufale ile aoga faafaiaoga. Peitai ole tausaga fou ole a faatutusa ai le score e ulufale ai le tagata aoga ile FOE ma le Faculty of Arts, Science ma isi. Ole score system na amata mai ai ile tausaga talu ai mo le FOE, sa mafai lava ona ulufale le 180–200 sikoa. Ae ole tausaga fou ole a sili atu ile 200 le sikoa e agavaa ai.
Peitai o talosaga mo le avanoa e toe sue ai mataupu na misi ma le faapasi o mataupu e lei sueina i lalo o aiaiga faapitoa ale Iunivesite, lea oloo fesiligia pea ese vaega o faiaoga.
Ole vaiaso talu ai na faataunuu ai le tufatufaina atu o faailoga faapitoa faaletausaga mo faiaoga ale Iunivesite. O taualumaga o lenei tufatufaga faailoga, mo ē ua faamanuiaina, e faatutū atu ai suafa o faiaoga na maitauina la latou galulue ile tausaga.
Molimauina le tofutofusia o vaega taitasi ma faailoga o faiaoga iloga mai lenei tausaga aoga, 2016.
