Talosaga ia Saina e toe faalelei malae o taaloga mo le Olopeleki

Ua mafanafana le iuni lakapi a Samoa i le sauni e talimalo i le malaga mai i Samoa o le aulakapi lauiloa ma logologoa a Niu Sila aemaise o le lalolagi, tainane foi o le siamupini lea o le lakapi i le lalolagi le All Blacks, auā ua tali mai nei le Malo o Saina o le a latou toe fausia ia lelei le malae autu o taaloga i le Apia Park, faapea ma le faaleleia o fale matamata ma isi vaega uma o le malae.

O lona uiga pe a fua atu i le saunoaga a le taitaifono o le iuni lakapi a Samoa le afioga i le Palemia, o le fesoasoani mai Saina mo lea galuega tele o le a tuumāmāina ai nisi sailiga tupe ma ni seleni e sasaa atu e le Malo e faaleleia ai le malae a o lumanai le taaloga a le Manu Samoa i ona eleele ma le ‘au a le Olopeleki i le masina o Iulai o le tausaga fou.

Na faaalia e le taitaifono poo le afioga i le Palemia, o le tulaga i le malae o loo iai nei e fai lava si faaletonu ona o le latalata mai tele o fale matamata ma pa o loo siomia ai i le malae autu, e lē pei o malae i fafo e fai lava si mamao i tua.

O vaega tonu ia o le a agai i ai le galuega o le a feagai ma Saina ia tuu mamao ese nisi o ia fale matamata ma taumamao ese le pa ina ia taatia mai le malae i se tulaga lautele ia saogalemu foi mo tagata taaalo.

Na talasua le alii Palemia i le feiloaiga ma tusitala sa ia faailoa ai le talia e le iuni lakapi a Niu Sila o le malaga mai i Samoa o le All Blacks, ma ia ta‘ua ai o malae i fafo e poo le ā lava le saoasoa atu o se tama lakapi e uma lona saoasaoa e lei uma le vaega e muta ai le malae, ae o Samoa i le tatou malae i le Apia Park, e vave ona faafeiloai le saoasaoa o se tama taalo e le pa ma fale matamata.

E lei faailoaina e le Palemia pe fia le tau o lea galuega a o afea foi e amata ai, ae e iai le talitonuga e lē o toe mamao ae faatino ona e fuafua foi i le aumai o oloa mai fafo e fausia ai le malae ia ausia se isi tulaga lelei ma sili atu a o faatali ai le aso 8 o Iulai o le tausaga fou 2015, o le a feiloai ai mo le taimi muamua le Manu Samoa ma le Olopeleki i o tatou laufanua.

O le faamautu ai o le aso ma le taimi o lea taaloga ua muta ai ma masalosaloga ina ua salalau muamua mai le tala, pe oo pe na o ni mea ula le tatau ona faia se taaloga a le Olopeleki i se atunuu o le Pasefika aemaise lava Samoa o loo toatele ana tamafanau o loo filifilia i le All Blacks.

Fale matamata i le malae o le Apia Park Photo: stadium.com