Ua fautuaina ele taitai ole malo, Afioga ile Palemia, Susuga Tuilaepa Lupesoliai Sailele Malielegaoi, ia le alii Tusiata faapolofesa o Samoa, le Susuga Papalii Penehuro, le faia lea o sana faatatau i povi ma faatusa, poo ana meatotino oloo ile Maota o Samoa i Aukilani Niu Sila, ona ua fia tapena uma mea ile nofoaga fou, le Maota o Samoa i Magele.
Ole finagalo ole alii Palemia, e pei ona faamatala ele Susuga a Papalii, “sei fai se tonu nei maumau mea la ei o.”
Aisea na oo ai ata a Papalii ile Maota Samoa i Aukilani?
E umi lava le faamatalaga ole mafuaaga na oo ai povi ma faatusa, o ata vane ma ata tusi, o faamalama felanulanuai (stain glass windows) tioata mosiac ma isi oloa oni mataaga a Samoa, i Niu Sila.
O oloa nei sa la‘u i container e faalauiloa atu ai le taleni tusiata i Samoa ise faaaliga faavaomalo sa faapea e faia i Saina ile tausaga e 2004. Peitai e lei oo le folauga a containers ile faaaliga i Saina, ae gata mai Niu Sila, ma faalauiloa ai ile maota o Samoa i Aukilani.
Sa iai ni tamalii faipisinisi ole atunuu, na latou unaia le avatu o oloa nei mo le faaaliga e lei oo iai oloa i Saina , ma taulamua ile vaaiga o tupe maua mai ai, faatasi ai ma ni tupe o ata na taulia.
Peitai ua faitau tausaga o taatitia ai lava ata ile Maota Samoa i Aukilani. Ae ole talanoa a Papalii, e atagia ai le maualuga o lona agaga faafetai ile Palemia ma le pulega ole Maota Samoa i Aukilani, ile lava onosaia ole taimi umi o latou teuina ai ia mataaga ma vaavaai faalelei.
E faapefea la ona toe faafoi mai nei mataaga i Samoa
E o mai nei e leai se tala ose tupe na maua mai le faaaliga i Niu Sila na faaaoga ai nei oloa. Ile faamatalaga a Papalii, ole tausaga talu ai na alu ai e tulituli le isi faipisinisi na latou galulue faatasi ile aveina o ana oloa i fafo, o ia foi le isi saini ole tusitupe. Ae avane le latou tusitupe, e na‘o le $600 tala na totoe ai.
O usitaia ele Tusiata le faatonuga ale Palemia?
“Ioe, e tatau ona ou usitaia, auā oute faafetaia le avanoa na faalauiloa ai au oloa ose mataaga atu i Samoa. Ae ole a sei saili ni tama se toaono e fesoasoani ia te au ile la‘u ma teu i container. Ole taimi nei sei sema se avanoa muamua, ma tau saili se tupe e aumai ai.”
“E ui ina oo mai nei lava, oloo manatua lava le faafetai mai o tagata na latou faatauina au oloa, ae leai lava ma se tupe o na faatau na oo mai i lou lima.”
“Sa ou fesili poo fea sau talā, ole a galo atu lava. Ua oo mai faafetai mai tagata Falani, Saina, Hollani i ata ole faaaliga (Exhibition lea, ae leai se tala ale Atisi na maua mai ai.”
E talanoa lava Papalii ma ona mata ataata i lea laasaga ole olaga na oo iai. Peitai ua ia manao e taulai ile toe amataina ole aoga BEN Beautiful Expressions of Nature ile tausaga lenei ma faasolo atu ai lava isi polokalame atinae ina ia faatumauina le tomai tusiata i Samoa.
O fea e ave iai oloa mataaga pe a taunuu i Samoa?
“Na afaina le aoga i Lelata a BEN ile taimi o lologa ile 2012. Ma toe tau laulau ai apa ma laupapa o meafaigaluega na totoe mai ai, ile fanua lisi mai le malo i Vaitele. O iina tonu lava lea ua tapena mo le aoga, ma faatuina ai le fale faaseeapa e faamataaga mo nei oloa pe a toe faafoi mai.”
Na talanoa foi le Tusiata, e nate fia foi lava ile aufaipisinisi lea na latou galulue faatasi i lea taimi, pe maua mai ai se tupe e toe aumai ai ana container oloa nei i Samoa. “O lea sa ou faatali, ae o tupe na maua ile 2004, e pa‘i ile $30afe tala Niu Sila na maua i faatauga, ae oo mai nei e le o malamalama poo fea o agai ia nei tupe.
Ole faanoanoaga ole Tusiata, ona e fesili atu ile isi faipule na latou faifaimea faatasi i lena taimi, ise fesoasoani mo le aumaiga o ana oloa i Samoa, ae faapea ane, “se o a‘u ia sa na‘o na alu atu lava e ave ta mea i o.” E talanoa lava Papalii, e alofa lava o nai povi, “Talofa e, i nai povi.”
