“Ua faaosofia lava a‘u i le tapenaina ia lelei o lenei oloa ina ua ou foi mai Saina”
O oloa o loo gaosi e lea tulafale ma lona aiga o le vanilla ma le kofe faapea le suauu mai le popo ua faaigoaina o le Virgin Oil.
Na filifilia Faiumu ma nisi o sui o le au faipisinisi i le atunuu e malaga i Saina i le masina o Setema e silasila i nisi o taumafaiga tau pisinisi i lea atunuu aemaise lava o atinae tau faatoaga.
Fai mai Faiumu e matautia lana silasila i faatoaga i lea atunuu ona e nimonimo le vaai i le tetele o fanua e faato‘a i laau tau faatoaga, ma le isi itu e lelei masini ma isi vaega e faatino ai le galueaina o faatoaga ma pisinisi i lea atunuu tele o le lalolagi.
Na foi mai loa i Saina e lei toe malolo i le silasila o Faiumu i vaega e faaleleia ai ana oloa gaosi aemaise le itu i le utu pepaina lea na ia faatau mai ai i Saina se masini e faapipii ai pepa poo le sealer.
Peitai e lei leva ona taunuu i Samoa ae maua atu se isi foai mai se Samaria agalelei o se kamupani i Niu Sila e ta‘ua o le Zoomslide Production, i se masini e sili atu ona lapoa ma malosi mo le faapipiina o pepa o ana oloa.
O ni sui o lea kamupani sa faia se suesuega i Samoa i le itu tau oloa gaosi na latou afea le pisinisi a Faiumu ma talimalo ai lea tamalii.
O lo latou agalelei e lei galo i sui o le kamupani ona na toe foi i Niu Sila ma lafo mai loa le masini e pei ona taunuu Faiumu mai lana malaga na alu ai i Saina ae taunuu loa le meaalofa.
O se isi lea faaopoopoga o fesoasoani mo lana taumafaiga aemaise o le fesoasoani a le faalapotopotoga o tina faipisinisi a Samoa.
Ua faaalia e Faiumu o lana taumafaiga o loo galulue ai lona aiga, ua maua ai ni seleni e fesoasoani i le atinae o meafai aemaise o le faaaoogaina o lana fanau, o faalavelave fai ma isi mau gasu o le soifuaga faasamoa e manaomia ai tupe.
O le suauu mai le popo o le Virgin Oil o loo gaosia e nisi o le aufaipisinisi laiti e pei o Faiumu ma lona aiga o loo alumia tele i faleoloa i Peretania o loo latou gaosia mea faamanogi e faamomosi ai tino o tamaitai ma alii faapea isi ituaiga o oloa mo le tausia lelei o le tino le body shop o loo faatau i ai le suauu Virgin Oil mai Samoa.
