Talitonu le faipule e iai le tagata na lafi i tua o ona moliaga

Le afioga i le Faipule o Faasaleleaga Numera 2, Pa‘u Sefo Pa‘u, i le ogatotonu o lona faletua ma se tasi o sui lagolago ina ua mae‘a ona toe ave i tua moliaga e fā sa molia ai le alii Faipule o le Palemene
Le afioga i le Faipule o Faasaleleaga Numera 2, Pa‘u Sefo Pa‘u, i le ogatotonu o lona faletua ma se tasi o sui lagolago ina ua mae‘a ona toe ave i tua moliaga e fā sa molia ai le alii Faipule o le Palemene

“Ou te iloa e iai le tagata o loo lafi i tua o le mataupu lenei ae sa ou sauni lava auā ou te iloa e lē o se taimi muamua lenei ua ou tu ai i le faamasinoga i ni moliaga o le palota,” o le finagalo lea o le Faipule o Faasaleleaga Numera 2 le afioga Pa‘u Sefo Pa‘u, ina ua maua se avanoa e faatalatalanoa ai ina ua mae‘a mai ona toe fofoga ona moliaga ma ua talia e le faamasinoga le talosaga a le loia a lē na faauluina le tagi e toe ave i tua le mataupu.

“O le isi mea lenei e tatau ona silasila i ai le Malo ma le Palemene, o le aumai e se tagata palota o se tagi ae lē o se tagata sa tauva i le palota, ma le isi itu, o le aumai aumai ona toe ave lea i tua ae lē o ane lava matou te tauivi auā na ou mafanafana lava e lē sa‘o moliaga na faia ia te au,” o le toe faaopoopo mai lea o le Faipule a o faafofoga nisi o matai o lona itumalo sa auai e tapuaia lona faamasinoga.

O se tasi itu na faaalia e Pa‘u e tatau i le Palemene ona toe iloilo lelei teuteuga o le tulafono o faigapalota ina ia aua ne‘i toe faaulu se mataupu i le faamasinoga ae toe ave i tua, ae ia faaauau pea ina ia saili le mea moni. O le finagalo o le alii Faipule e faasino i moliaga na aafia ai ona o loo iai lona talitonuga e leai ma se moliaga e faamaonia pe ana fai e lē toe faamaui i tua le tagi.

O le afioga Pa‘u Sefo Pa‘u sa tulai muamua i le nofoa o Faasaleleaga Numera 2 i nisi o paeaiga ua tuanai a le Palemene ma o le faaiuga o le palota i le aso 4 o Mati 2016 na toe filifilia ai e le itumalo ma lē toe umia ai o le nofoa e le Faipule o le Tautua Samoa sa seei i le tofi o Faasaleleaga Numera 2 i le paeaiga ua mavae a le Palemene, le susuga Papalii Li‘o Taeu Masipa‘u.

“O le fautuaga a le itumalo lea ou te iloa ua toe ave ai i tua le mataupu lenei, ma o le a ou faasaga atu e fai le finagalo o le itumalo o atinae mo so latou lumanai lelei.”

E pei ona silafia o le afioga Pa‘u Sefo o se faipisinisi lauiloa i Samoa i le tautua o falemaliu, ma e lē gata ina faagaioia i Upolu ae faapea foi i Savaii.

E filifilia nei e lona itumalo o loo faaauau pea ona galue i lana pisinisi tau falemaliu ae o loo iai foi lona faletalimalo i Sogi, lea o loo iai ma lana kalapu mo tafaoga o le Seana.