O le ola galue ma le ola auauna i le Atua, e lē se mea faigofie, e tele faafitauli ma afā e afea ai le faigamalaga ma tauau ina sau ai le musu ma le vaivai e galue. O le sini lea ma le autu o le Faaolaolaga o agaga o le fanau a le Atua o loo momoli mai e lana aufaigaluega totofi.
O le ekalesia Universal Pentecostal Church e tolu ona matagaluega o loo iai nei i Niu Sila ma le tasi i Samoa ma le isi tasi i Tutuila. O le taitai aoao o lenei ekalesia o le susuga ia Poe Sua o loo tausia le galuega i Maagao i Faatoia, ae ua malaga mai i Aotearoa nei ona o le polokalame faaolaola a nisi o ona lala o loo i lenei atunuu.
O le tasi o ekalesia o loo i Manukau, o le isi o loo i Waterview ma le isi tasi i Te Atatu. Ua mafai ona tuufaatasi nei aulotu e tolu ma faatinoina ai lenei faamoemoe. E tolu aso sa faagasolo ai lenei polokalame, o le Aso Faraile, Aso Toonai ae faaiu i le afiafi o le Aso Sa i Te Atatu.
O le faaiuina la o lenei polokalame na vaaia ai le faatumulia o le komiuniti hall i nei aulotu e tolu faatasi ai ma nisi o uo asiasi na asia lea sauniga. Sa faapea foi ona auai ai nisi o faafeagaiga ia Jacob ma Terry.
O le susuga i le faafeagaiga ia Lautolo Vaatiuola o loo tausia le galuega i Te Atatu na taitaia le sauniga, ma faafeiloaia le mamalu o aulotu ma sui asiasi na auai atu. O le tatalo na fofogaina lea e le faafeagaiga mai Manukau le susuga ia Feagaimaleata Fauoo. Ma sosoo ai ma le folafolaina o le afioga a le Atua e le taitai aoao o le ekalesia ia Poe Sua.
O le luitau a le failauga mo tagata, “O Iesu o le tali i taimi o matagi” o se feau na afea ma talia gofie i loto o tagata faalogologo ona o mea o loo tutupu pea i lenei soifuaga. Sa faapea foi ona saunia e aulotu taitasi aitema auā lava le faamaualugina o le viiga o le Atua.
O le mae‘a ai o le sauniga na faaiu ai i le taumafataga na saunia lava e le ekalesia malosi mai Te Atatu ma faauma ai i le tu ma le aganuu a Samoa e pei ona masi ai. O le faafeagaiga lava ia Lautolo Vaatiuola sa fai ma sui o nei aulotu e tolu e momoli le agaga faafetai le taitai aoao o le ekalesia e tusa ma lana galuega maeaea na faatinoina i nei aso e tolu.
Ma ua atoa ai foi nofoa o le laulau a lenei ekalesia i lenei polokalame ina ua malaga mai le taitai ia Poe Sua, sui taitai o Sila Tinitoloa, Failautusi o Lautolo Vaatiuola ma le teutupe o Feagaimaleata Fauoo.
