E tiga lava ona loulouā le aso i timuga ma le savili ae lei tuua ai e le alo o le atunuu ia Lupesoliai Laauli Joseph Parker lona faatāuaina o le valaaulia e pei ona talimalo ai le aoga tulagalua a Mangere East i le aoauli o le Aso Lulu ua mavae 11 o Me.
E lei avea foi le tetele o timuga e taofia ai le lolofi atu o le mamalu o le atunuu i mātua ma aiga i le fia vaai ma fia faalogologo i lenei alo o Samoa a o ia faasoa mai i le tāua o lana taleni e pei ona tautaua ai i le lalolagi atoa.
Ua fefiloi atunuu eseese i lea aso i mātua Fiti, Tonga Samoa Initia na Saina. Ae o se aso ua maualuga i le susuga i le alii pule ia Anthony Noble-Campbell ma le mamalu o faiaoga faapea le aoga atoa ina ua mafai ona tali faatuaeleele e Laauli le faatalauula atu a le laumua.
Na molimauina le sagisagi fiafia o fanau a o pepese ma faailoa le tu a tagata whenua e faafeiloai ai le taunuu atu o le afioga ia Lupesoliai Laauli Joseph Parker.
Na sosoo ma le saunoaga a le alii fusu e faafeiloai ai le mamalu o le aoga ma mātua sa auai ma faailoa ai le matua o lona soifua lea faatoa 24 ona tausaga.
Na ia talatala foi i le tele o taaloga sa fiafia i ai e pei o le lakapi, voli polo, softball ae silisili ai lona fiafia tele i le taaloga o le faipelē. Mai le taimi o lona laititi sa ave ai o ia e lona tamā e koleni i le GYM ina ia alu ai e fusu. Ma o lana taaloga lenei ua mafai ai ona fealuai i le tele o atunuu eseese o le lalolagi e pei o Ausetalia, Tonga, Amerika, Lusia ma isi atunuu; ua 10 nei fusi ua ia umia talu ona ia faipelā.
Sa aoga i le aoga tulagalua a Papatoetoe North ma o ia o se tama e faalogo, usitai ma toaga e fai ana meaaoga, ma o le mataupu e fiafia ai lava o le Maths poo le Numera.
Ae sa fesiligia e nisi o le fanau a le aoga a Mangere East poo ā taimi e alu ai e koleni a o ā foi meaai o loo tausi ai lona soifua, ae sa tali Lupesoliai o Aso Gafua uma e toe kuata i le lima i le taeao ua tamoe i le 5maila le mamao, ona foi mai lea fai lana malu taeao.
E fiafia e ai le polesi, moli ma isi meaai paleni. Na ia fautuaina foi le fanau i totonu o lea aoga ia 100% le ‘ai i meaai e maua ai le soifua maloloina, ia 100% le koleni malosi ae aua le ‘ai i meaai e maua ai le ma‘i.
Ae sili ai o ia o se tagata e pipii tele i lona aiga ma alofa i lona aiga. Ua ia talitonu ai o le mafuaaga lea ua alualu ai i luma lona taumafai ona o le lagolago malosi a lona aiga i ana taaloga.
Na ia saunia foi ni voucher e fai meaalofa ai i le fanau, faatasi ai ma lana sausaunoaga e faailoa ai lona loto fiafia i le mafutaga ma mātua ma fanau aoga. O le afioga ia Fata Reupena Vaoga sa fai ma sui o mātua ma faiaoga e momoli le agaga faafetai i le afioga ia Lupesoliai Laauli Joseph Parker ma lona aiga e tusa ai ma lona taliaina o le valaau.
Ae na saunoa le faletua ia Sina Mauigoa, o ia o le Social Worker i totonu o Mangere East Primary School, ua lua ma le ‘afa tausaga talu ona faato‘ai se avanoa o Lupesoliai Laauli Joseph Parker e asiasi mai ai i totonu o le aoga, ona o le faamoemoe ina ia avea o ia ma Role Model i totonu o le aoga.
E lē gata i lea ia faatāuaina ai le aoga, ona o le tele o faafitauli i totonu o le aoga o le lē aooga o tamaiti, o lea sa ia fuafuaina ai lenei polokalame ina ia auai Lupesolai e talatalanoa ma tamaiti ma ta‘u atu ai i mātua le tāua o le ave o fanau i le aoga.
