O le faletalimalo o le Waipuna Hotel i Mt. Wellington na talimalo ai le tino o taitai o le Pasefika le Pacific Leadership Forum ile Aso Faraile na tea nei, aso 11 o Iuni, ile faamalamalamaina o le tala faaletupe o le tausaga (Post Budget) 2016/2017 a le malo e pei ona feagai ma le Minisita o Tupe, o le Sui Palema foi lea, Hon. Bill English.
O lenei taligamalo na soosoo tau‘au ai le Pacific Leadership Forum ma le matagaluega mo Tagata Pasefika (Ministry for Pacific Peoples MPP) faapea foi ma le Pacific Business Trust (PBT) ma le matagaluega o manuia lautele (Ministry of Social Developments, MSD).
O le Afioga i le Minisita o Tagata Pasefika, Peseta Sam Lotu Iiga na toalua mai ma le Sui Palemia, auā le fofogaina faamalamalama o le tala o le tupe aemaise o vaega o loo aafia ai tagata Pasefika.
E tolu (3) vaega na vaevaeina i ai polokalame o le aso. O le feiloaiga na amata ai lea aso ae lei taunuu le Sui Palemia, o le feiloaiga lea a le Pacific Leadership Forum ma ana valaaulia, na tatalo amata ai le Susuga i le Faafeagaiga Rev. Faasooletalalelei Auvaa, ma faalauiloa ai e le Taitaifono o le Pacific Leadership Forum (PLF) le Tofa Teleiai Pa‘u Edwin Puni ia i latou faatoa feiloai, le uiga o le Pacific Leadership Forum, ma lona foi tulaga i totonu o Aukilani ma Niu Sila aemaise o le mafuaaga na amataina ai ma ē o loo taitai ai ma galulue ai.
O le vaega lona lua o le polokalame o le aso, o le faamalamalamaina lea o le tala o le tupe a Bill Engish. Pei lava o le tu faa-Pasefika, e muamua lava mea faalelagi lea na taitai ai le Susuga ile toeaina Rev. Setefano Leiite o le Ekalesia PIC Samoa i le tatalo amata, sosoo ai ma le pitolaau autu o le aso, le folasaga ma se fasoa a le Sui Palemia, o fesili ma tali e pei ona fesili ai le atunuu auai, ae faaiu ile tatalo na saunia e Rev. Thomas Kino o Rarotonga. O le vaega mulimuli o le polokalame o le aso lea, o le polokalame a le Ministry of Social Development, le vaega foi lea o loo nafa ma penefiti, faapea le vaega o Fanau Talavou ma Aiga (CYF) lea na tatalo amata ai le isi faifeau Rarotonga, folasaga a le Ministry of Social Development, fesili ma tali a le atunuu, ae faaiu ile tatalo na saunia e le faifeau Kiripati.
O se vaaiga matagofie o lea aso ona o le saoaluma o taitai o le Pasefika e aofia ai le Susuga i le toeaina ia Reverend Elder Setefano Leiite o le Ekalesia PIC, Afioga ia Patele Michael Endermann o le Ekalesia Katoliko, le Peresetene o le Katoliko Samoa i Aukilani, Tofa Seve Afuamua Lafaele, Rev. Elder Faasooletalalelei Auvaa o le Ekalesia Papatiso, le Afioga i le Sea o le Ekalesia Metotisi Rev Elder Masunu Utumapu, le Susuga i le Toeaina Rev Laki Slade, Susuga i Faafeagaiga ia Pastor Lui Ponifasio ma le Faletua ia Ane Ponifasio, le Afioga i le Sea o le Ekalesia Metotisi a Niu Sila, le Faletua ia Rev. Suivaaia Te‘o, o faauluuluga o ekalesia eseese a Tonga, e pei o le Susuga i le Faafeagaiga Rev. Dr. Ilomaisini, faauluuluga o ekalesia eseese a Rarotonga, Niue, Tokelau, Fiti, Tuvalu ma Kiribati, aemaise o le taupati atu o faauluuluga o matagaluega eseese a le malo ma kamupani tumaoti.
Na faaoo mai le faanoi a le Afioga ile faipule o Magele, le Tofa Su‘a ona o tuatuagia o lea aso na lē auai ai.
O se tasi foi o vaaiga matagofie o lea aso o le auai o le Afioga ia Misa Telefoni o se tagata iloga i upufai o malo e pei ona avea ai ma Sui Palemia o Samoa i ni nai tausaga e lei leva atu, faapea foi nisi sa avea ma palemia o le malo o Cook Island ma Rarotonga Susuga i alii fomai Dr. Joe Wiliams ma Dr. Wontoon), o sui o aiga taualoa (Nobels) a Tonga ma le tele lava o taitai o atumotu aemaise, ma ulu o matagaluega eseese faa-Pasefika i matata eseese.
O le iuga o faatasiga faapea, e fesilisili le au talatala ma le au maitau poo le ā se mea aogā na maua.
I se vaivaiga i lea itu, e ama se manatu i se faasoa a le malo ae maualuga le agaga faagaeetia ona o le mafai ona tutu faatasi ma galulue faatasi taitai o le Pasefika, i tulaga o galuega, aemaise o le aufaigaluega totofi a le Atua.
Ua lē gata o le au failotu, au faipisinisi, fauluuluga o matagaluega a le malo tainane ulu o matagaluega ma ofisa tumaoti.
Faamatalaga na tuuina mai: Sooalo Setu Mua
