Talimalo Amerika i le Mafutaga tuufaatasi a Faifeau

‘Samoan Pastors International Network 2013’

E iai taiala e limataitaiina ai le Network (Sootaga) a le aufaigaluega a le Atua mai soo se ekalesia.
E lē se Network e fai ni saoga tupe pe faatutuina ni lotu, ae faapitoa i le atinaeina ma le faamalosia o le aufaigaluega i lo latou valaauina.
E lē faatusatusa ai ni talitonuga poo ni ekalesia, e lē faatusatusaina agavaa poo tomai, a ia soloia pa o tapuaiga ua saisaitia ma feeseeseai ai le aufaigaluega.
O le 13 lea o tausaga o lenei mafutaga, lea sa talimalo ai uso faifeau mai Amerika.
O sui sa taulamua, o Ps David Katina, Ps Dan Magalei ma Ps Solomona Mageo, ma le tele o nai auauna mai isi ekalesia sa tutu faatasi e lagolagoina lenei sootaga. O le nanamu o le ola ma le fealofani sa matilatila i lea sootaga, ma molimauina ai le alofa faasoasoa o le Atua i ana auauna.
O se mafutaga matagofie, auā e foliga mai e pei se aiga ma se ekalesia e tasi le fiafia ma talie, tatalo, pepese faatasi ma fetagisi faatasi. O isi e fou atu sa matuā maofa i le fealofani o auauna, e ui e eseese ekalesia e omai ai. O le faletalimalo o le Marriott i le Setete o Kalifonia sa faamautu ma faatino uma ai fonotaga, vagana taumafataga faafeiloai ma le faamavaega sa faia i le Ekalesia Nasareta i Anaheim.
E filifilia faiaoga ma failauga mai le mafutaga, e tofu sao foi ekalesia taitasi i lea faamoemoe. O faifeau mai Amerika Samoa, Hawaii, Ausetalia, Niu Sila, Amerika ma Samoa e iai i lenei Network, ua matuā mafanafana la latou faigauo, e ui e eseese tapuaiga ma ekalesia e galulue ai, ae ua fusia ma soofaatasi i afioga a le Atua, ‘e iloa e le lalolagi o ou soo moni outou, pe a outou fealofani.’
E pei ona faataunuuina i tausaga uma o le mafutaga a faafeagaiga, e iai lava le aso e faapitoa mo le taamilosaga tapolo a susuga i faafeagaiga. Ma o le tausaga nei ua siamupini ai ma tauaaoina atu le ipu manumalo i le susuga Ps Elia Sipaia, o le Full Gospel i Papatoetoe, Aukilani. E ova atu ma le 30 sui auai mai Niu Sila, silia ma le 20 sui auai mai Ausetalia, faapea ma sui mai Samoa, Amerika Samoa, Hawaii, ae o le toatele na auai e o mai Amerika. Na lē mafai ona auai nisi e toatele i le mafutaga ona o le taugata o pasese e Malaga ai i Amerika.
O le tausaga muamua lenei ua faatāua ai i totonu o le network, ia fanau a faifeau, le au PK (Pastors Kids).
O se avanoa faapitoa lea ua tuu avanoa ai i fanau e fai ai foi se latou sootaga ma latou faamasani ma faasoa manatu, ma faamalosiau faaleagaga auā e tāua foi latou i le galuega a le Atua e pei ona valaauina ai mātua, aemaise o le galuega fai faatasi a le aiga atoa, e tāua le galuega faigata o loo tauave foi e nai fanau a faafeagaiga. E pei ona silafia, o le faatamā o le Network o le susuga ia Iliafi Esera ma le faletua ia Fia mai le Faith City Church i Wanganui, o le susuga foi ia Iliafi o le Peresetene o le ekalesia aoao a le Assembly of God i Niu Sila.
Ua avea i laua o mātua faaleagaga aemaise o se faatamā i le toatele o faafeagaiga o le mafutaga a faifeau. O le isi fonotaga a le Network o le a faia i Samoa i le aso 8-12 o Setema 2014, e talimalo ai le ekalesia a le Peace Chapel, susuga ia Ps Samoa ma Alesi Unoi. Afai e fia malamalama atili i lenei mafutaga, e mafai ona e faafesootai ane le failautusi, Ps Chris Sola (Dream Centre, Manukau) mo nisi faamatalaga.