Ua loa tausaga o fesili tagata Samoa faapea le Pasefika poo afea ea e toe faia ai se isi vae o le tauvaga taitoafitu faavaomalo a le IRB poo le World Series i Sini nei? O le tausaga e 1989 na faia ai le fitu mulimuli iinei lea sa sue siamupini ai Samoa ma Niu Sila ina ua faia‘ina Fiti ia Samoa i le taaloga o le semi.
Ae peitai ua faamautu mai nei e le IRB le siitia mai o le vae o le fitu sa masani na faia i le Gold Coast e faia i Sini i le malae o le Olimpeka i le masina o Oketopa 2015. O le masina foi o Oketopa i le tausaga talu le tauvaga mulimuli na faia i le Gold Coast.
Faaalia e le pulega a le Iuni Lakapi a Ausetalia se faatonu ia Bill Pulver o se avanoa lelei lea mo Sini e faailoa atu ai i le lalolagi o Sini o se aai e lē gata i le matagofie ae peitai o le agavaa i taliga malo tetele faapenei.
E lē gata i le lelei mo le aufili a Ausetalia lea ua vaaia le sologa lelei o ana tapenaga mo le Olimipeka i le tausaga fou, ae faapena foi ia Niu Sila lea e toatele tagata Maori i Sini nei ma latou e lagolago i le Olopeleki. Mo Toga o le malosi o le tapuaiga a le Ikale Tahi i Sini o le a ono toe malosi mai ai. Ae mo Fiti ma Samoa lea ua tofo muamua i le suamalie o le Manumalo i tauvaga tetele nei.
O se vaaiga mataina o le a tulai mai i ‘au tapuai a nei atunuu e numera tasi ai le lakapi. O Fiti na siamupini i le fusi o le Gold Coast talu ai lea na sue siamupini ai ma le Manu Samoa. E ta le afa o lami Fiti e 26-0 ae peitai na toe tuli atu lava e le Manu toeitiiti manuia i ‘ai 26-24.
O le tausaga e 2010 na siamupini ai le Manu Samoa i le tauvaga lenei a le IRB na faia i Adelaide ina ua malolo ai Amerika i le suega siamupini.
