Ua matala le finagalo o le faamasinoga i le talosaga a Mualia Salamo e ala mai i lana loia le tamaitai o Rosella Papalii e tuua galuega a le faamasinoga ae malaga i Amerika mo ana siaki faafomai. O Mualia e lima moliaga o loo molia ai e mafua i se pusaoloa na aumai i Amerika mo Samoa ae na maua ai ni vaega e fesootai ma le puta faasāina o le aisa faapea ni laau malosi e lē faatagaina ona faaulufale i Samoa.
O le amataga o taualumaga a le faamasinoga i le mataupu sa tulai ai le alii loia le afioga Leuluaialii Tasi Malifa mo lē ua molia, lea sa ia talosaga ai i le faamasinoga e avatu se faatagana e tuua ai e Mualia Samoa ona e iai ana siaki faafomai e fia fai i Amerika.
Peitai sa tetee malosi loia a leoleo ona o le latou mau, a talia lea talosaga o le avanoa lea e alu ai lē ua molia ma lē toe foi i Samoa e tali ona moliaga. Sa faavae lea finauga a loia a leoleo ona o Mualia o se tasi sa tautua i le fitafita a Amerika ae ua malolo litaea, ma o se tagatānuu foi o lea atunuu.
Peitai sa tuai ona faia se faaiuga a le faamasinoga i le talosaga ona e iai vaega sa fesiligia e le faamasinoga e tatau ona tuuina atu e lē ua molia ma lana loia e faamautu ai mafuaaga o lana sikai faafomai.
Na toe valaau i le vaiaso na tea nei le mataupu ma molimauina ai ua suia le loia e tauaveina le talosaga a Mualia. Na toe faatumau ai foi le mau tetee a loia a leoleo i le faataga o lē ua molia ona tuua Samoa ona o atugaluga i le toe foi mai e faaauau le suesueina o ona moliaga.
Peitai sa faailoa i ai e le loia a Mualia, o aseta uma a lē ua molia ua i lalo o le Malo e faatali ai le taunuuga o le faamasinoga, ma e tāua ia aseta i lē ua molia ma e lē faapea o le a alu ma lē toe foi mai ona e naunau e toe maua ana meatotino uma ua taofia i lalo o aiaiga o le Tulafono e taofia uma ai ni aseta a se tagata poo ni tagata e tuua‘ia i ni solitulafono e fesootai ma laau ma pauta faasāina le tulafono lea e ta‘ua o le Proceeds of Crimes.
O le talia o le talosaga a Mualia Salamo ma lana loia ua faatonuina ai, e tatau ona toe foi mai i Samoa a o lei oo i le aso 7 o Tesema 2015 o le a amata suesueina ai ona moliaga. Ua faatonuina foi ia saini ni tagata se toalua ma faamauina lea sainigalima i se aofaiga o se tupe e $5,000 tala ma ia saini se maliega e poo se bond e sefulu afe tala.
O ia vaegatupe uma e faamautu ai le mau a lē ua molia ma lana loia e toe foi mai i Samoa mo lona faamasinoga. O le tasi o aiaiga o le talia o lana talosaga e tuua Samoa o le toe faafoi o lona tusifolau i le ofisa o faamasinoga e taofia ai, seia mae‘a suesueina moliaga ma maua se faaiuga a le Faamasinoga Maualuga.
