O le tauasa mai ai o le afioga i le Minisita ia Sala Daniel Pinati Ah Leong ma lona faletua ia Sisilia faapea le aumalaga mai Samoa a le Ekalesia EFKS, na molimauina ai le talisapaia ma le fiafia o le mafutaga a Leauvaa i Niu Sila nei e tali le sāvali e pei ona asia ai laufanua o Aotearoa.
O le taeao o le Aso Toonai na faataunuuina ai le posiva a lenei afioaga i le hall a le Old RSA i Otahuhu auā se seleni na tagi mai ai le Ekalesia mo le fausiaina o le maota o tina i le matagaluega EFKS Leauvaa.
Na tumutumu tamafanau a lea nuu faapea uo ma ē masani sa auai i le lagolagoina o lea faamoemoe.
O le susuga i le aoao ia Faimata o se tasi o lupe faalele o le afioaga sa taitaiina lenei polokalame i le tatalo, ma faagasolo ai loa i ipu a le aumalaga, faatasi ai ma ipu a le mafutaga faapea ipu a uo ma ē masani sa tauala atu i nisi o alo ma tamafanau o le afioaga.
O le susuga ia Ainiu Tua Ainiu o le taitaifono o le mafutaga i Aukilani sa tu i le foe i le faasoasoaina o le polokalame.
Ae o nisi o tamafanau o le afioaga o Leauvaa le alii o Walter Laulu ma Siaosi sa ofoina le laua galuega fesoasoani e ala i le fa‘ili sa faafiafia ai le mamalu o le auvalaaulia.
O le afioga ia Aeau David Ah Leong ma le faletua ia Moira Ah Leong sa tele foi lo laua sao i lenei faamoemoe e ala i le hall na saunia faatasi ai ma le taumafataga na ofo fua uma atu auā lava le fia faitaulaga i le Atua ma le galue e ofoina mo le nuu.
O le maau ma le limalima alofa o alo ma tamafanau aemaise o uo ma ē masani sa auai e $61,988. O le agaga faafetai i le afioga i le Minisita na saunoa ai i lea aso e faafetaia ai le agalelei ma le lotonuu o tamafanau o Leauvaa e tusa ai ma le talileleia o le sāvali. Ae o le tofa ia Vaifale Iose o le sui o le aumalaga na tutootoo i faaaloaloga e pei ona masani ai aso faapenei.
E to‘a 10 le aumalaga na malaga mai Samoa o sui o le Ekalesia faatasi ai ma le Minisita ma lona faletua, ae 8 aiga o loo auai i le mafutaga i Niu Sila nei ma o loo taitaifono ai le tofa ia Ainiu Tua Ainiu.
