Ile 22 o tausaga o galue ose loia le susuga Pradip Chandra Reddy i Ausetalia faapea ma Fiti sa tele lu’itau sa feagai ma ia ina ua siitia mai lona faletua i Samoa e faamautu ai. O tausaga uma e lē tuua lona malaga mai i Samoa e mafuta i lona faletua ma toe foi i Ausetalia e faaauau ai lana galuega ose loia. O o la alo e toaono e faamautu uma i Ausetalia ae na mafaufau pea le alii loia e fia maua se taimi lelei e mafuta atu ai i lona faletua i Samoa ma faaaogā ai lona tomai faaloia.
Ole Aso Faraile ua mavae na taunuu ai lea fuafuaga ale alii loia ina ua faaofi ma talia i galuega ale Faamasinoga i Samoa e pei ona iai le sauniga masani e talia ai loia e galulue ile faamasinoga ale atunuu. Ole afioga ile Faamasino sili, afioga Patu Tiavaasue Falefatu Sapolu na seei ile sauniga e avea ai ma faauluuluga o galuega ale faamasinoga e faafeiloai le alii loia.
Na saunoa le Faamasino sili ma ia faaalia le agaga fiafia ole faamasinoga a Samoa e faaulufale ai se tasi o loia ua tele tausaga o galue ma ose isi lea o faaopoopoga ile tomai faaloia i galuega ale faamasinoga. Ole susuga Pradip ose loia e finauina soligatulafono ma e lē tau fesiligia ole a galue ose loia e puipuia le mama atoatoa ose tagata e molia ini solitulafono mamafa poo criminal cases.
Ole tamaitai loia le susuga Unasa Iuni Sapolu na ia tuuina atu le talosaga poo le motion ile faamasinoga mo le faaulufaleina ole susuga Pradip Chandra Reddy ose loia, ae ole Pelesetene ole sosaiete a loia i Samoa na ia faamaonia le tuuina atu ole talosaga.
Ina ua mae’a le sauniga na faaalia ele alii loia o lona agaga fiafia ua taunuu lana miti ole fia galue ose loia i Samoa ma maua ai le mafutaga ma lona faletua. Na soisoi lona faletua ma ia faaalia foi lona agaga faafetai ia i latou uma sa lagolago atu ile fuafuaga a lona toalua e galue ai ile faamasinoga ale atunuu.
Ole alii loia o Pradip ole uluai tagatanuu Initia Fiti ua galue faaloia ile faamasinoga ale atunuu ma e lē taumate ose fesoasoani foi lea mo ni tagatanuu Initia Fiti poo tagatanuu foi o Initia o aumau ma alala i Samoa e maua ai lea avanoa e tauave ni a latou mataupu ele alii loia. E 3 tausaga le umi ole taimi ole a galue ai Pradip ile faamasinoga a Samoa ma lona laisene e galue ai ose loia i Samoa e mo se vaitaimi.
