Rev Eric Mulitalo ma lona faletua ia Anote Mulitalo, aumalaga mai Samoa faapea le mafutaga a Fasitootai i Aukilani

Rev Eric Mulitalo ma lona faletua ia Anote Mulitalo, aumalaga mai Samoa faapea le mafutaga a Fasitootai i Aukilani

Ole feiloaiga ale mafutaga a alo ma tamafanau ole nuu o Fasitootai i Aukilani ma le susuga ile faafeagaiga ia Rev Eric Mulitalo ma lona faletua ia Anote ma sui ole ekalesia e toatolu, le failautusi faapea a’oa’o fesoasoani e toalua, ile Aso Toonai ua mavae, 20 o Ianuari ile hall ale ekalesia PIC i Manukau, na talia ai ele mafutaga le savali ale susuga ile faafeagaiga ile toe fia fausia lea ole hall ale ekalesia faapea le maota ole galuega oloo iai nei i Fasitootai.

Na amata le feiloaiga ile sauniga lotu puupuu na saunia ele susuga ile Faafeagaiga mai Samoa ia Rev Eric Mulitalo ona sosoo ai lea ma le ‘ava ole feiloaiga na tapenaina ele mafutaga i Aukilani.

Ole faatagisia ole fesoasoani a tamafanau ole nuu i Aukilani, ua toe liuliu ai le tofa ma le faautaga loloto i aiga ole nuu oloo iai ile mafutaga ina ia toe faamaopoopo alo ma fanau o Fasitootai e tali ile valaau ale ekalesia EFKS i Fasitootai.

E ui ile vava mamao o nofoaga ma le pisi i tiute ma galuega i nei atunuu ae lei tuua ai lava le lotonuu ma le lotoaiga aemaise le silasila ile Atua ma lana galuega, le taupati atu o aiga ma fanau e apogi le feiloaiga ile Aso Toonai e pei ona faatalauula mai ai le susuga ile faafeagaiga ma le ekalesia i Samoa.

Ole tagata ma lona faasinomaga ole tagata foi ma lona tupuaga.

Ole fofola mai ele faafeagaiga ole auga o aute ole savali, na lagona ai e nai tina ma tamā matutua sa auai le loto ole alofa ona ole masii mai ole fala siigata ile auauna ale Atua ma lona faletua faapea sui ole ekalesia.

Ua tasi nei le faafitiga o aleaga ma loto e tasi ai le mafutaga i Aukilani, ole Aso Sa oloo lumanai nei e toe feiloai ai alo ma tamafanau ole nuu, e saili ai le laulau a fono ale mafutaga ma toe faamaopoopo ai le mafutaga ina ia fai loa se fuafuaga ile toe fausia lea ole hall ma le maota ole galuega i Samoa.

Ole masina o Aokuso lea ua autasi iai le mafutaga i Aukilani ma le aumalaga mai i Samoa e faia ai se sailiga seleni auā lea faamoemoe, ma ua iai foi le fuafuaga e toe malaga mai ai le faafeagaiga ma nisi o sui ole ekalesia i Samoa.

E to’a 20 aiga oloo auai ile mafutaga a Fasitootai i Aukilani, ae ole susuga ia Mati Elive ma le susuga ia Valuniu Faamoe oloo taitaiina le mafutaga ile taimi nei seia mautu se laulau a fono ale mafutaga e faatinoina ana polokalame i lenei tausaga.

E pei ona ta’ua ele susuga ia Valuniu Faamoe, o lea ua oo mai le fanoga ole ekalesia i Aukilani, ae ua mae’a nisi o atunuu e pei ona iai Ausetalia lea sa iai foi le sailiga tupe ale EFKS i Fasitootai.