Oloo tālia nei se aso e faataunuuina ai se iloiloga ale faamasinoga mo taaloga i Samoa poo le Sports of Tribunal e faatatau lea ise tusi na tuuina atu iai ele Peresetene talu ai ole asosi o fusuaga ale atunuu, Fesola’i Vaaiga Tuigamala.
O Tuigamala e 10 masina na ia pale mai ai ile tofiga ole Peresetene mo le asosi o fusuaga ae faia ai le palota ile masina o Novema ole tausaga na tea nei ma soloia ai lona tofiga ole Peresetene ina ua faia’ina ile palota ae filifilia ai se tasi o tamalii ole atunuu, o Tagaloa Papaliitele Pasi Poloa ma peresetene fou ole asosi.
Ile finagalo o Tuigamala na mafua ai ona ia ave se tusi ile Kapeneta, e leai se mafuaaga tatau na aveese ai o ia ma le tofiga ole Peresetene, faatasi ai ma le faiga na fai ai le faigapalota talu ai, e lei mulimulitaia ai faiga faavae ale asosi.
Ta’ua e Tuigamala, e lei atoa lona 12 masina ile tofiga e tusa ai ma le faavae ale asosi e tatau ona 12 masina ae peitai e na’o le 10 ona masina na ia tauaveina ai le tofiga ae manatu nisi ole laulau ina ia faia loa le fono faaletausaga ale asosi ma toe filifilia ai ni sui fou ole komiti.
E lei mafai ona talanoa mai Tuigamala ile tele o isi mau faamatalaga e faatatau i lea faigapalota na faia talu ai ma suia ai tofiga ale asosi ona na ia ta’ua, oloo i lima nei o lana loia le mataupu, ma o lea foi e tālia se aso e faataunuuina ai le iloiloga ale faamasinoga faapitoa o taaloga lea e tatau ona tofi mai ele Kapeneta se komiti e gafa ai ma le iloiloina o lea mataupu.
Pau le faanoanoaga o Tuigamala, a nate lei faia lava se mea sese talu mai ona ia tauaveina le tofiga ole Peresetene, e nate lei ‘aia foi ni tupe se’i tulou, ae ole auala ua aveese ai o ia e lē fetaui lea ma auala e tatau ona uia i soo se filifiliga o tofi. Saunoa Tuigamala, ole mataupu lenei e iai lona talitonuga ole a matuā manino lava pe a faataunuu le iloiloga ale faamasinoga o taaloga poo le Sports Tribunal.
Ole mataupu lava lenei ua faamaonia mai ai ele Peresetene ole asosi o taaloga ale atunuu le SASNOC, le susuga Patrick Fepulea’i, ua faamalolo lē tumau ai nei le asosi o fusuaga mai i lalo ole ofisa o taaloga ale atunuu seia tālia le faaiuga mai ile iloiloga ale komiti faapitoa o taaloga ale atunuu.
Saunoa Fepulea’i, oloo mafai pea ona faataunuu polokalame masani ale asosi o fusuaga ile taimi lenei peitai e lē o mafai ona toe aloaia ai le latou asosi o fusuaga mo le filfilia lea ose ‘au taaalo e fai ma sui o Samoa i soo se taaloga faavaomalo. Soo se taimi lava e filifilia ai se aufili a Samoa, ole a tofia foi ele pulega ole SASNOC faiaoga ma i latou e tauaveina tofiga mo le aufusu ale atunuu, e pei ona ta’ua e Fepulea’i. Ae ise tasi o vaega ole mataupu lenei na maua e tatou tala i taaloga, na fautuaina ai ele loia ale asosi, le susuga Aumua Ming Leung Wai le tatau lea ona toe iloiloina ma tusia lelei se faavae fou mo le asosi o fusuaga, ona o nisi o vaega o lea faavae e lē o paleni lea mo le itupa o tamaitai poo le gender balance. Faatasi ai ma le feeteena’i tele o iai nisi vaega ole faavae e pei ona ta’ua ai ile Vaega 13 ole Faavae e tatau ona 5 tausaga o tofiga, ae oloo ta’ua foi ile vaega lona 17 ole faavae, e tatau ona tasi le tausaga ma toe faia le faigapalota.
Ta’ua e Tuigamala lona faanoanoaga ile tulai mai o lenei mataupu ae oloo aafia ai tama taaalo. Na taumafai atu le tatou nusipepa mo se finagalo ole Peresetene fou o iai nei ae e lei manuia, manatu ole a maua atu se isi ripoti ile mataupu lenei ile tatou lomiga ole vaiaso fou.
