Tali Vui Masinamua i le motusia o le leitio 104.6FM

“E leai, e lei sola gūgū le tautua, ae na faamavae lelei lava ma faailoa i le atunuu le tulaga o le a oo i ai le auaunaga”

E matuā teena e Vui tuuaiga sa faasga ia te ia e uiga i le motusia ai o le auaunaga a le polokalame Samoa News Talk back, sa faatautaia i le alaleo o le 104.6 FM, e pei ona lomia i le vaiaso talu ai.
Na saunoa Vui i se feiloaiga ma le Samoa Times, ua maea lava ona faasilasila aloaia i le atunuu le taunuuga na oo i ai le tautua.
“E leai, e lei sola gūgū le tautua, ae na faamavae lelei lava ma faailoa i le atunuu le tulaga o le a oo i ai le auaunaga.
E lei alo foi i le ata o le niu se faamatalaga sa fai, sa tuusao lava ma ta‘u sa‘o le solo a le tamaloa i luga o le ea, ma faamavae aloaia ai e tusa ma le faafofoga a Samoa”, o le saunoaga manino lea a le susuga i le alii pule, le afioga ia Vui Masinamua.

O mafuaaga na mafua ai ona faamuta le auaunaga
Ua lē mafai e le tulaga tau seleni ona toe faaauauina le polokalame ona o le taugata tele.
Na mafua foi ona lē gafatia le totogi ona o le lē faamaoni o kamupani sa sainia konekarate mo le lagolagoina o le leitio i ana faasalalauga masani.

Na ta‘ua e le alii pule e faapea, sa manaia lava le tulaga o seleni pe a silasila i fuainumera sa sainia e ia kamupani, peitai o se upu i le faatinoina e ala i le totogi ane o tupe, e matuā leai lava lea.
E oo mai lava i le taimi nei, o loo tauanau pea ma faaoleole i ai mo le totogi ane o aitalafu, peitai e matuā faigata lava.

O le faamuta o faasalalauga o se faiga ma se gaioiga sa manatu Vui, ua alagatatau ona faia ona e foliga mai o le a faateleina ai se vaega tupe aitalafu e feagai ma lona tagata, pe afai e faaauau pea le leitio, ae o loo faaauau pea foi ona lē totogia pili ma totogi o faasalalauga a kamupani sa malilie i ai.

E lē gata i le tulaga tau seleni sa mafua ai ona taofia le auaunaga, ae sa faafofoga lava foi le atunuu o faailoa le leai ma le utiuti o taimi o le aufaigaluega e faatino ai le auaunaga i le po.

E mafua lea ona e tofu lava i latou ma le galuega mautu sa tautua ai, a o taimi o le leitio o le 12am seia oo i le 5am i le vaveao, ma ua faitioina ai le au galulue, ona o le lē lava o le malologa.

Faaaogāina o tupe o leitiofoni
E na o le $1,400 le tino i tupe sa faamaopoopoina i le taimi sa faatino ai le faamoemoe, ae $2,400 sa faamauina e ala i le valaau ane i luga o le telefoni.
E oo mai lava foi i le taimi nei, e lei toe feiloai lava ma le isi vaega tele o seleni e pei ona faailoa ane e le mamalu o le atunuu.

O le vaega tupe foi e pei sa mauaina, sa tuusa‘o lava i le totogi o le alaleo e tusa ma le $1,200 i le vaiaso.
E teena foi e Vui lea faamatalaga e faapea e lua ni leitiofoni sa faia. Saunoa le alii pule, e na o le tasi lava le sailiga seleni sa faatinoina, lea la na maua ai le tinoitupe e pei ona faailoa, atoa ai ma le seleni e lei vaai lava i ai.

Tupe na maua i le tatalaina o le leitio
E faamaonia e Vui le $8,000 na maua i le aao foai ma meaalofa sa foai e le atunuu i le po sa faalauiloa ma tatala ai le leitio.
O lona faaaogāina, sa tuuina nai seleni i le au galulue, atoa ai ma le totogiina o le taumafataga sa saunia e le kamupani e saunia taumafa.

O se vaega itiiti sa totoe, sa fesoasoani foi i le totogiina o le taimi o le ea, poo le tau o faasalalauga.
E leai lava la se tupe sa sese ona faaaogāina, e pei lava ona saunoa manino le afioga i le alii pule.
O le tulaga foi o seleni sa silafia uma lava e tamalii sa matou galulue lona faaaogāina, ma le aofai o seleni sa maua mai.

O le saunoaga faaiu a Vui sa ia toe ta‘ua ai e faapea, e ui lava i ia mau faafitauli, ae sa maualuga lava le manatu e toe foi mai i se vaitaimi poo le masina o Me, pe afai ae toe solosolo manuia le tamaoaiga o le atunuu, ma toe agai ane ai kamupani e totogi a latou pili e fesoasoani mo le taimi o le ea.

Ae ui i lea, ua lē mafai ma ua manatu ai o le iuga lea o le tautua ma le leitio sa taumafai iai. E lei matamuli foi le afioga ia Vui e tautino, o loo feagai pea o ia ma le totogia o le alaleo, ona sa faamuta le auaunaga, ae lei mae‘a le taimi sa sainia ai ma faatulagaina o le maliliega.

E lē gata i lea, a o le va o ia ma le faletupe sa faaune ane ai seleni e faaleoleo mo taimi leaga o le tamaoaiga.