Tali manaoga o leoleo e fai se Komisi Suesue

Le afioga Samoa Mulinuu Mulinuu ma le afioga Afamasaga Michael Soonalole, o nisi o Komesina lagolago ole Matagaluega o Leoleo. Ole Komesina ole pulega ole Tineimu le susuga Lelevaga Faafouina oloo ile itu agavale ole ata, ose tasi o sauniga sa tuufaatasia ai le Matagaluega o Leoleo ma le Tineimu
Le afioga Samoa Mulinuu Mulinuu ma le afioga Afamasaga Michael Soonalole, o nisi o Komesina lagolago ole Matagaluega o Leoleo. Ole Komesina ole pulega ole Tineimu le susuga Lelevaga Faafouina oloo ile itu agavale ole ata, ose tasi o sauniga sa tuufaatasia ai le Matagaluega o Leoleo ma le Tineimu

Ole autu ole sainigalima a leoleo sinia ma nisi o leoleo fai tā‘ai o sui ole Asosi a Malu ole Malo, ua lē toe iai se faatuatuaga ile taitaiga ale Komesina le afioga Fuaivailili, ma ua tatau ona faia se Komisi Suesue e saili uma ai faaletonu i omoomo ma patupatu ua oia ai le lotoifale ole Matagaluega o Leoleo.

E ui e lē o iai se finagalo ole Malo e momotu le mafutaga ale Komesina ma le Matagaluega peitai o lea ua tali le isi o vaega tāua ole sainigalima ia faia se Komisi Suesue. Ole finagalo lea ole Kapeneta i lana fonotaga faanatinati ile Aso Gafua ua mavae ina ua pueina ma taofia le Komesina ma molia i nisi moliaga faasolitulafono e ese mai moliaga e fā ua toe faaui i tua ma faalēaogā ele faamasinoga.

Ua faafofoga le atunuu i tala ole gaioiga a leoleo na faia le suesuega faasaga ini tuua‘iga ole Komesina le afioga Fuiavailili Egon Keil, i lona solia ole tulafono. Ose gaioiga ile taeao ole Aso Gafua ua mavae, na gatete ai le faafofoga ale atunuu ina ua latou maua tala ole lokaina ole Komesina ma molia ini solitulafono.

O moliaga ole taufaaoso e faaoo le oti, le umia ose aupega malosi e lē faatagaina, umia ose aupega matautia, ma le moliaga ole lafo oni faaupuga tau faamata‘u.

Ose tasi o lipoti ale Samoa Times ise lomiga e lei mamao atu sa folasia ai le suesuega na faia poo le lima masina ua tuanai a‘o galue pea le Komesina e lei faamalolo lē tumau. Ole osofaiga o laau faasāina i Faleatiu ua fanau mai ai le moliaga ole faaoso ose leoleo e faaoo le maliu ise taulealea ole nuu o Faleatiu na iai ile nofoaga na faia ai le osofaiga.

Ole osofaiga foi lea oloo fanau mai ai moliaga ole umia ele Komesina ose laau malosi e lē faatagaina ma le umia ose laau malosi matautia. Ole laau malosi lea ole ituaiga ole AK-47 lea na avatu ile polokalame faamagalo a leoleo mo tagata o umia ni aupega malosi e lē faatagaina mo le faatama‘ia ae leai ni moliaga faasolitulafono e molia ai.

Ole a toe foi se faamatalaga ile lokaina ole Komesina ma molia. Faaalia ese molimau ose leoleo sinia, na usu atu le Komesina ile taeao ole Gafua lea mo le toe faaauauina o ona tiute ole faauluuluga ole Matagaluega ina ua mae‘a lona faamasinoga ua ave i tua moliaga ma faalēaogā.

Fai mai le molimau na agai sa‘o le Komesina i lona ofisa ma feiloai ai ma le Komesina lagolago le afioga Samoa Mulinuu lea ua faamalolo foi lē tumau ona ose isi mataupu, ae lē ole pueina ma molia le Komesina e pei ona faaalia ai ele Sui Palemia, le afioga Tuitama Talalelei Tuitama i sona finagalo i luga ole Faletelevise ole TV1.

Ole feiloaiga lea ale Komesina ma Samoa sa tauaveina le tulaga sui Komesina na ta‘ua ele molimau na aliali ai le toatamai ole afioga Fuiavailili, lea e faapea na ia faia ai ni lafoga e faapea ole a vaai nei iai i latou (leoleo sinia) na fafauina le tele o nisi o gaioiga faasaga ia te ia a‘o faamalolo lē tumau. E iai le talitonuga ole sainigalima na ave ile kapeneta ole tasi lea o mataupu e faasino iai lea finagalo ole Komesina.

E faia le feiloaiga lea ale Komesina ma le sui Komesina ae agai atu loa leoleo sinia na faia le suesuega ma logoina le Komesina e tusa o ona aiātatau faaletulafono ona o lea ua iai nisi moliaga ole a molia ai.

Faaalia ele molimau sa tulai mai ai loa se feteenaiga ae peitai sa mafai lava ona agai ane leoleo sinia ma le Komesina ma faasasa‘o loa ile potu taofia ma faapea loa ona feosofi ane ai nisi o leoleo e faalavelave ile galuega.

Ose tasi o leoleo na ia lafo ni upu masoā i leoleo na faia le galuega, le mafuaaga na loka ai foi ma lea Malu ole Malo ua molia ile faia oni upu taufaifai. E iai foi nisi leoleo e lagolago malosi ile Komesina na feosofi ae na faaalia ele molimau sa lē mafai ona latou taofia le faatinoga ole galuega.

Na loka le Komesina ma ona togiga e pei ona faaalia ele molimau, ae sa faatonuina e tatala ona laei ae sui atu ini ofu savili. Ile tea ole valu lata ile iva ile taeao lea na loka ai le Komesina ae na faatoa tatala i tua ile lata ile 3 ile aoauli ole Aso Gafua lava lea, 14 o Novema 2016.

Ole faaiuga ole fonotaga faanatinati ale Kapeneta na faia ile aso lea, ua faamalolo lē tumau ai le Komesina ae faatali le taunuuga o taualumaga ale faamasinoga. Ua faamalolo lē tumau ai foi ma sui Komesina le afioga Samoa Mulinuu ma ole a suesueina le sui Komesina ese Komisi Suesue, ini tuua‘iga sa faia iai se sailiiliga ale Kapeneta.

Faia se Komisi Suesue mo le suesueina o mataupu ile Matagaluega o Leoleo

Ua faamaonia ele Kapeneta le faamalolo lē tumau ole Komesina Lagolago o Leoleo ia Samoa Mulinuu Mulinuu, e tusa ai ma le Vaega 56 ole Tulafono o Galuega Tau Leoleo 2009.

Ua faamaonia foi ele Kapeneta le faia ose Komisi Suesue e tusa ai ma le Vaega 55(4) ole Tulafono o Galuega Tau Leoleo 2009, e iloilo ai agatausili a Samoa a‘o galue ai ose alii leoleo.

E pei ona faailoa atu ile Pepa o Faamatalaga ile Aso Gafua, ua faamalolo lē tumau foi ele Kapeneta le Komesina o Leoleo, Afioga Fuiavailili Egon Keil, mai ona tiute, a‘o tālia ai se faaiuga ale Faamasinoga i moliaga fou ia ua faia faasaga ia te ia.

O ia moliaga na faia e Leoleo, a‘o lea ua tuuina atu nei ile Ofisa e Faafoeina Moliaga Tau Solitulafono mo le faia ole iloiloga.

Oloo faamauina ile Tulafono o Galuega Tau Leoleo le tatau ona faia o suesuega e faasino ile faatinoga o galuega poo le tulaga ole Komesina ma le Komesina Lagolago.

Ua faamaonia foi ele Kapeneta, ole a faalautele atu le iloiloga ale Komisi Suesue i mea oloo tutupu i totonu ole Matagaluega o Leoleo faapea ma le faatinoina o a latou auaunaga.

Ole a iloilo auiliiliina ele Komisi soo se vaega ua lape ai pe ua lē atoatoa ai le faatinoina o galuega a Leoleo, ma ole a iloiloina foi ni amioga ua aafia ai le talitonuina ele mamalu ole atunuu ole auaunaga ale Matagaluega. O lenei iloiloga ole a faia ise taimi talafeagai ile lumanai e faatonuina ai ele Kapeneta mamalu.

Ua faamautu ele Kapeneta le faamalosia o aiaiga mo le talosagaina, faaaogāina ma le teumaluina o aupega ele Matagaluega o Leoleo. Soo se talosaga ma le faatagana ole faaaogāina o aupega, e tatau ona tuuina muamua mai se fautuaga mai le Afioga ile Palemia, Sui Palemia, Loia Sili ma le Faatonu ole Ofisa e Faafoeina Moliaga Tau Solitulafono.

Ole a auauai ane Komesina Lagolago ole Matagaluega mo le faatinoina o tiute ole Komesina o Leoleo ile taimi nei, seia toe iai se isi faaaliga e tuuina atu.