“E faigofie lava ona malamalama i lē o fia silafia moni le faamoemoe ma lavasiga o loo taumafai i ai le Malo ina ia atiae Samoa, ma maua gofie galuega mo fanau ua iu mai aoaoga i tausaga uma tausaga uma lava”
O lipoti ma manatu faaalia e lē gata o le Itu agai a o nisi o ‘au faitofa o upufai o Malo poo polokiki na laga ai ni manatu i le fuafuaga a le Malo e talia tagata faipisinisi mai fafo e oo i le miliona a latou tupe e faafaigaluega i Samoa ma faamatuu i ai tulaga tagatānuu poo sitiseni.
Fai mai nisi o le faatauga o Tusifolau i ia tagata maumea ma o le a faamatuu atu ai ma le tofi o tagata Samoa i tagata ese. O manatu faaalia foi ua lipotia ua faaalia ai le natia e le Malo o le toe fausia o le nofoaga e taunuu, ma malaga ese ai pasese i le malaevaalele i Faleolo ona o loo iai le fuafuaga e faatau e Saina le malae vaalele. O se tali tusitusia lenei a le Palemia na auina mai i se tulaga faalauaitele.
“E leai se mea faapea e tupu i le lalolagi o le faatau fua e se atunuu o se malaevaalele o se isi atunuu. O se manatu faavalevalea tele lea na o se vale faataitai na te faia. Ua ta tei foi i ia manatu faatupu vevesi faalotoleaga tagata.
Tasi lava le uiga o lea manatu ia taofia ai se atinae aoga faatupu galuega ma atili siitia maualuga ai le tautua ma tosina mai ai tagata asiasi maimoa mai o loo toatele tatou fanau o loo maua ai latou galuega e tausi ai aiga, fai ai faalavelave, o faiga taulaga ma totogi ai aoga a fanau.
O atinae nei o Turisi e pito telē lona sao i le siitia maualuga o Samoa e Malo Aufaatasi mai le lio o atunuu matitiva i le atunuu ua maualuga lona tamaoaiga. O latou la ia o loo faia faaupuga ia, ua matuā manino lo latou agaga – Ia faatumau le ola matitiva o Samoa”.
O le faatau atu o Tusifolau o se isi lea o tuua‘iga na aumai i ai se finagalo o le Palemia: “E matuā leai, leai, leai lava se Tulafono o fuafua e teuteu ai le Tulafono o Tusifolau e faatau ai ni Tusifolau. Tasi lena tuua‘iga faavalevalea tele.
O le tuuina atu o Tusifolau, o loo faatonutonu e le Tulafono o Tusifolau. O le itu o loo sese ai i Sini poo o loo taufaasese ai ua pa‘ua‘i, ona o le Tulafono tau faatosina mai o pisinisi tetele mai fafo pei o le Yazaki e omai e fai ni a latou pisinisi i Samoa, e maua ai ni galuega mo tatou tagata.
Ae faatosina la i le tuu i lalo o le taimi faatali ai mo le avea ma sitiseni Samoa mai le 5 tausaga o loo iai nei i le 3 tausaga mo i latou e ana ia pisinisi”.
“Ia maua tele ai galuega faaopoopo mo fanau aoaoina a Samoa. O lea faiga, o loo fai e le tele o atunuu i le agaga lava lea e tasi e pei o tatou. Fai e Niu Sila, Ausetalia, Fiti ma isi. Ma e tāua tele mo Samoa ona e faa leai ni aseta se tele faatupu galuega, se‘i vaganā ona eleele (mo faatoaga) a tagata ma le sami.
Talu ona fai isi tatou faatosina i le faaulufale mai o masini, e leai ni tiute i le 50 tausaga talu ai, pau lava ni atinae tetele mai fafo ua tulai mai ai na o le Yazaki ma le Faletalimalo tele a le Au Papua Niu Kini o loo fau nei i Taumesina. A uma ane le isi 50 tausaga, ua toe faaopoopo mai se isi tolu pe 4 ni pisinisi faapea, ua tatau loa ona tatou pepese aleluia”.
“O faafitauli o loo feagai pea ma Samoa i le tulaga o ni pisinisi tetele e faatosina mai, o le toagaogao o le tatou faitau aofai (small market) ma le tau mamao mai le tele o atunuu e maketi i ai tatou oloa.
Ae ono iai lava nisi e fiafia i lea foi ituaiga faatosina o le sitiseni e faafaigofie ai ona malaga e asiasi i isi atunuu o le lalolagi o loo iai a latou pisinisi ae lē fia nofomau i Samoa nei.
O uiga masani ia o loo tupu i atunuu o loo fai foi a latou faatosina e faaaogā i ai sitiseni. Tele taimi e telefoni mai ai isi foi VIP e fia malaga mai i mataupu tāua i Samoa ae fia maua vave sa‘u faamaoniga tusitusia e faigofie ai ona maua visa e malaga mai ai ma afea Ausetalia poo Niu Sila e vaalele e malaga mai ai ona o le faafaigata foi o ia atunuu ona pasia a latou visa”.
O le feiloaiga amata a le Palemia ma tusitala e ala i le polokalame i luga o le leitio o le 2AP o lenei tausaga fou, na tali atu ai foi Tuilaepa i nisi o tuua‘iga e faasino i le aumai o Saina e faia pisinisi i Samoa aemaise o le atinae o loo fuafua i le malaevaalele faavaomalo i Faleolo.
O le finagalo o le Palemia ua tele atinae ua fesoasoani ma agalelei mai ai Saina. O se atunuu ua tele lona sao i le tamaoaiga o Samoa. Saunoa le Palemia o nisi o loo faitio pea i lenei mataupu o le au faipisinisi, ae o le anavatau lea o fuafuaga tau pisinisi a le Malo, ia tele ni atinae tau pisinisi e faatauva, auā e manuia ai tagata e lē gata o galuega ae o le tau o oloa.
O loo molimauina le tumutumu o le atunuu i faleoloa o Saina ona o le gafatia o le tau o a latou oloa.
