Tali i le manava tatā ma le fiva taifoi

Poo le ā lava le fiti e fiti ai, e ta‘u loa fanau ua aafia i le fiva taifoi ma le manava tatā, e tasi lava le faaupuga e fai e tagata, o le fainaelo se‘i tulou ma le lē tumamā, ma o le mafuaaga lea e lē tuumamaina ai e le afioaga o Falefa, faamatalaga o lipoti a le soifua maloloina ua faapea mai ai o le toatele o fanau laiti a le afioaga ua aafia i nei gasegase e lua.

E faalauiloa lea lipoti ae manumalo mai Falefa i le nuu aupito matagofie o le motu o Upolu i nuu mavae. O se laasaga maualuga ma o fesootaiga ma Falefa i tausaga ua tea na manino ai o se nuu e maopoopo tele lana mafutaga poo komiti a tina ma e lē ‘asa foi asiasiga ua molimauina le faia e tina. O le fesili la pe aisea ua mafua ai lea lipoti.

O suesuega na faia e le Matagaluega o le Punaoa faalenatura ma le Siosiomaga, ua maua ai, o le faafitauli tele lava o loo vaaia i le afioaga e tele le suavai maua ae e lē o lelei ona tali atu le nuu i aiga i le faaaogāina o le suavai ma e masalomia o loo felavasa‘i le suavai lea e faaaogā i paipa ma le suavai lafoai auā e leaga tane o fale lē ta‘ua.

O le gaioiga la lea na vaaia i le vaiaso na tea nei ua taunuu mai tane o fale lē ta‘ua tane uga ia na aumai mai fafo ma ua amata ai lava ma galuega e eli nofoaga uma e agai i ai otaota lafoai o faleui nei ma taumafai ai e faamamā atoa ia nofoaga.

E faigofie tele ona aafia ai le soiifua maloloina. Faaalia e le tasi o faauluuluga o le mafutaga a tina o le afioaga, le tina ia Pusi Crichton, e faalua i le masina ona asiasia faleui nei a le afioaga, e ese mai i asiasiga masani o laufanua o aiga ma o le faafetai ua ave i le Malo o Samoa i le mafai ai ona filifilia Falefa e ave i ai le fesoasoani lea, ma o le a mautinoa ai lava le faamalosia o le tumamā ma le matagofie o lea afioaga e pei ona manumalo ai i le tauvaga o afioaga ma aai matagofie lea na faia le laugatogi i le vaiaso ua tuanai.

O le matagaluega la o Punaoa Faalenatura ma le Siosiomaga lea ua amata le galuega lenei ma le afioaga ina ia mafai ai ona faamamā atoa ma sa‘o le agai o le suavai lafoai i tane uga ua faapea ona avane mo lea vaega tāua o le soifua maloloina ma le siosiomaga mamā.

E lē na o Falefa ua maua lipoti mai i le soifua maloloina le toatele o fanau ua aafia i gasegase e pei ona ta‘ua, ma o le faamoemoe o le matagaluega lenei ina ia iai se suiga i nei afioaga ua aafia i le suavai o loo maua i totonu o maota ma laoa.
O le taumafaiga e aveese le typhoid ma le diarrhea

O le taumafaiga e aveese le typhoid ma le diarrhea