O le ave e le Falemai i Nuuli Amerika Samoa le LBJ o le Faalapotopotoga o Vaa a Samoa (Samoa Shipping Corporation) i le faamasinoga maualuga a Amerika Samoa i le vaiaso na tea nei, na ta‘ua ai e le tasi o Ofisa Sili Lagolago a le Faalapotopotoga i Apia, e faateia ai le latou ofisa ona o lea lava e faatali le faamaninoga o lenei mataupu ua tuu atu nei e le falemai i le Faamasinoga.
O le mataupu lenei ua ave ai le tagi a le falema’i i Amerika Samoa i se pili tuua o le falema’i ona o le togafitiga ma le taofia ai o se sui o le Kamupani Vaa a le atunuu i lea itu o le atu Samoa.
“O se alii faigaluega a le matou ofisa na lavea ma togafitia ai a o iai i Amerika Samoa,” o le faamaoniga lea mai ia Sooalo Kuresa o le pulega a le Faalapotopotoga o Vaa a Samoa.
Faaalia e le falemai o le LBJ i Nuuli, o le tau o le togafitiga o lea alii faigaluega na oo atu i le $11,243 afe tala ma le 93 sene ma o le tupe Amerika. O le masina o Novema o le tausaga na tea nei na togafitia ai lea alii. Faaalia e le loia a le Falemai ia Doug Juergens ua mae‘a ona aumai se faatonuga ina ia totogi atu le tupe ae e lē o ano atu lava le Faalapotopotoga o vaa, ma o le mafuaaga lea ua agai ai i le faamasionga mo se fesoasoani.
O le tagi lea ua talosaga ai se faatonuga a le Faamasinoga Maualuga ina ia totogi atu e le Faalapotopotoga o vaa le $11,243.93 Amerika atoa ai ma le tau o le loia ma le faamasinoga.
O le tali na tuuina mai e le afioga Sooalo Kuresa, e sa‘o sa togafitia se tasi o le aufaigaluega i le LBJ ma na aumai le pili muamua ma sa totogi, ae o le pili lona lua na aumai sa iai fesili na tuu atu i le Falemai ae e oo mai i le taimi lenei e lei tali mai lava le falemai i Amerika Samoa, ae o lea e faateia i le logo atu ua ave le mataupu i le Faamasinoga a Amerika Samoa.
Faaalia e Sooalo, ana tali mai fesili na tuu atu i le pili mulimuli ua aumai, atonu ua totogi atu le pili, peitai e lei iai se fesootaiga talu ona totogi atu le vaega muamua o lea tupe.
