Ole polokalame a tamā ole ekalesia ole Christlife i Onehunga ile po ole Aso Sa 20 o Aokuso na le toe lagona ai se pisa i totonu ole falesa ae usi lelei le faalogo ole toatele o tamā aemaise ole auvalaaulia sa molimauina lea polokalame i molimau a nisi o tamā na auai i totonu o kegi ile tele o tausaga ae tuua ai na’o la taitoalua ma latou fanau.
Ose avanoa na tatala mai ai le ato ponapona a nei tamā ile leaga ole nofoaga sa iai a’o lea ua feliuaiina ele Atua o laua olaga ma toe foi ai ise olaga lelei ma toe mafuta ai ma le toalua ma le fanau.
Molimau a Futi Sia
Ile faamalosi ale susuga ia Futi Sia ile po ole Aso Sa i tamā ma fanau talavou, e aua ne’i maimauina se taimi ose tagata e fia auai ai i totonu o nei kegi, auā ua ia iloa le leaga ole nofoaga mo tagata. E 10 tausaga sa mafuta atu ai ile kegi ale Mongrel Mob ma ose olaga leaga tele sa ia oo iai. Ua le maua ai se mafutaga lelei ma le aiga ma le fanau aemaise ai o mea leaga uma ole olaga lenei ua oo iai, e pei ole ula mariuana, pauka, inu pia, ma ua le oo ai foi ise lotu ile olaga atoa. O lona fale ua fai lea ma aiga ole latou kegi e inu pia ma ula mariuana ai, ae ua le maua ai foi ma se fiafia ile tina ma le fanau. Ile tele o nei tausaga sa iai i fiafiaga ole olaga na ia iloa lelei oloo tatalo pea lona toalua ma lana fanau mo ia ina ia faasaolotoina mai ia mai mailei ale alii ole lalolagi.
Faailoa e lenei tamā le fiafiaga sili i lona toalua ma le fanau ina ua mafai ona toe liliu lona olaga mole Alii, aemaise ai ua matutua si laua fanau. E lei faigata ile Atua ona tali le manaoga ole aiga auā ole masani lea i aso uma, ole tatalo faatauanau ma le anapogi ina toe foi le olaga ole tamā ise olaga lelei.
Faamalosi le susuga ia Futi i tamā sa auai i lea po, ia avea oe tamā, ose tamā malosi ile Alii, ma ia ta’ita’i lou aiga ile faaolataga ale Atua e manuia ai le fanau.
Molimau a Anos Perese
Ole susuga ia Anos Perese ua 63 nei tausaga o lona matua, ae ole 14 o ona tausaga sa iai a’o laititi sa amata ai loa ona auai i nisi foi o kegi. O Anos ole afa Samoa ma Maori ae sa fanau i Niu Sila nei, ma e 10 tausaga sa auai ai foi i nei faalapotopotoga poo kegi ma maimau ai lona ola. Na tuputupu a’e i Whakatane a’o lei malaga mai i Aukilani ma nofo ai. E tele ina fiafia e ula cocaine, mariuana ma isi lava mea sa fiafia iai lona olaga. Ole 10 tausaga sa iai i totonu o kegi ma faaaogāina lona ola i mea leaga ole lalolagi na lē maua ai se avanoa e toe nofo ai i lona aiga ae ua nofonofo solo i ana uo oloo latou mafuta. Ole faamalosi ale susuga ia Anos sa faatatau lea i tupulaga talavou ina ia taumamao i latou ma le o i nei nofoaga a’o laiti, ua ia iloa ma a’oa’oina mai ia ile leaga o lona olaga a’o laititi. Ua matua foi ma ua fai lona toalua ma lana fanau ua ia lagona ai le sese ole amataina o lona olaga.
Ae ua laki foi le malolosi o lona fanau ile lotu ma tu’itu’i atu pea i lona loto ma faailoa atu ai le lelei ole Atua lea oloo auauna iai e fesoasoani i lona mafaufau. Auā e matua a’e lava ma fai lona toalua ma lana fanau oloo fiafia lava i tuinanauga ole olaga. Ae faafetai ile Atua ua feliuaina lona olaga ona o lana fanau ma lona toalua sa fesoasoani ia te ia ma ua toe maua ai se aiga fiafia ma se mafutaga manuia.
Ole aotelega o nei molimau uma i lea po ma aitema na saunia e tamā ole Christlife ma tamā ole Good News Kingdom na afiafi faatasi lea ile upu faauuina ale Atua na saunoa iai le susuga ile faafeagaiga ia Rolani Mikaele e faapea ia iloa ele tamā lona valaauina.
Ole valaauina ole tamā e tatau ona iai se tofa mamao e manuia ai aiga nuu ma le ekalesia. O tamā ole faavae ole aiga e mauaa ma mausaili ai le aiga i aso leaga ma aso faigata.
Taualuga lea po ile valaau faapitoa na saunia mo tamā aemaise o soo setasi e fia manaomia se tatalo mo lona aiga poo se manaoga faapitoa.
Ole tofa ia Lemalu Siaosi ole taitai lea ole mafutaga a tamā ale Christlife na momolia le faafetai ile failauga ole po le susuga ia Rolani Mikaele faapea foi i aiga ma uo sa auai ile polokalame ole po. Ole polokalame muamua lea ua mafai ona tuufaatasia e tamā o lea ekalesia e pei ona saunoa iai le fofoga ole poi a Lemalu Siaosi.
