O soo se nuu mase afioaga o Samoa e lē solomuli fuafuaga ile saili o mea lelei ma tāua mole aoaoina o fanau auā ole lumanai manuia lea o aiga ma nuu ma ekalesia aemaise ole Malo. Ole mafuaaga foi lea e lē nofoai ai matai ose nuu oloo lotolotoi i tonu fai ile faaleleia o faleaoga ma fausia ni faleaoga fou mole manuia o aoaoga a fanau.
E faapena le finagalo ole komiti male pulega ole Aoga tulagalua ile afioaga o Satalo i Falealili ina ua latou savalia le ofisa ole Malo o Iapani ma talosaga iai mo se fesoasoani e fausia ai se isi faleaoga fou. E 137 afe male selau fasefulu tasi tala le foai tupe a Iapani na tali atu ai ile talosaga ma faapena ona faatino ai loa le galuega.
O lea ua tauaao nei iai ele sui ole Malo o Iapani i Samoa le galuega ua mae‘a ma ose faleaoga ua iai potu e valu faapea se potutusi male potu mo faiaoga. Faaalia ele sui o Iapani i Samoa le afioga Tuimaugaoalii Kazumasa Shibuta, e lē tuua lava le agaga fesoasoani o lona Malo ona e tāua tele i taitai o lona Malo le atinaeina ole olaga aoaoina o fanau a Samoa.
O lana saunoaga ile umusaga ole galuega na ia faailoa ai foi le tumau pea o lea fesoasoani a lona Malo mo nuu oloo fia maua ni faleaoga lelei, peitai e pei ona silafia o fesoasoani nei e iai ma aiaiga ma tuutuuga e tatau ona faamalieina ona faatoa talia lea ose talosaga.
Ole taitai ole Malo le afioga ile Palemia susuga Tuilaepa L Sailele Malielegaoi, na ia ooti le lipine ole faailoga ole tatalaina aloaia ole galuega, ma o ona moomooga lelei ia popoto ma atamamai fanau ale afioaga auā ua aulelei le faleaoga ua iai nei. O faiaoga foi ole faalagolagomaga lea o talotaloga ia manuia le olaga aoaoina o tama ma teine ole nuu.
Ole nuu o Gataivai i Savaii ua iai nei ise vaega o lona faleaoga tulagalua se nofoaga ua faapitoa mole aoaoina ole faitautusi male tusitusi a fanauiti, e faafetaia ai le agalelei ole Malo o Amerika. Ose nofoaga ua iai totoga ma isi vaega e faatino ai le aoaoina ole faitautusi male tusitusi a tamaiti.
Ose nofoaga faapea na tatala foi ile aoga tulagalua a Manunu ini vaiaso e lei mamao tele atu. Ole fatu o lenei poloketi a Amerika oloo taulamua ai faiaoga pisikoa mai lea Malo tele, ia faaleleia le faitautusi male tusitusi a fanau o Samoa.
