E le misi se tausaga ma fai faauuga a le polokalame o le Aganuu Faasamoa 101 i matua faapea fanau o loo aotauina i le faatauaina o le aganuu a Samoa i totonu o Niu Sila faapea foi isi atunuu o le lalolagi o lea ua mafai ona oo iai le faasoa ma le aoaoina o le aganuu a Samoa.

O nei vasega e leo faapitoa na o fanau, ae o loo tatala le avanoa i soo se matua poo soo se tagata na te fia iloa ma faatauaina le aganuu ma le agagana a Samoa. Ua iai matua ua silia i le 60 tausaga ae ua iai foi ma tagata o loo faauluulu iai nisi o kamupani ma matagaluega a le malo i totonu o Niu Sila o lea ua latou mauaina lea avanoa e aoaoina ai le aganuu. Ma ua latou iloa foi le taua o lea polokalame mo i latou sa ola ma fananau i atunuu i fafo e mafai ai ona malamalama i tu ma aga o le aganuu.

Pei ona faasoa le susuga ia Tanoai Tai’i Alofipo Reupena Tanoai i le manulauti o loo taumafai ai pea le polokalame a le aganuu faaSamoa 101 e faatinoina, o le taumafai lea e momoli ma faailoa i alo ma fanau o Samoa na ola ma faananau i atunuu i fafo, o Samoa e ese mai lava i isi atunuu o le lalolagi, o lana gagana ma lana aganuu o mea alofa foai fuaina mai i le Atua. O le aganuu foi a Samoa e tatau lava i soo se tagata Samoa ona malamalama ma iloa lona faasinomaga ma lona tupuaga, ae e tatau foi ona ia iloa le taua o le aganuu a Samoa. Ma o le mafuaaga lea o le naunau ai o le afioga ia Patele Iosefo Timu o loo avea ma faatama o lenei polokalame, faapea lo laua vaa see lua ma le tofa ia Asiava Tuipea e faatino nisi o aoaoga i le aganuu a Samoa ina ia taumafai ia iloa e le tama ma le tina, tama ma le teine Samoa le aganuu a Samoa.

Ua silia i le 3000 tamaiti aoga Samoa o atunuu eseese ua faamanuiaina i lenei polokalame, ma ose fiafiaga sili lea i nisi o matua ma aiga faapea ekalesia o loo iai nei fanau, ona o le taua o le polokalame lenei ua mafai ai ona latou vaai ma faalogo ua folafola e fanau ni toanai, pe a tauaofia se aiga poo se toanai foi a le ekalesia. Ua tele foi faatasiga a aulotu o loo fai, o lea ua latou molimauina ai le faaaogaina o latou fanau i le faatinoina o le ava o le feiloaiga. O le vaiaso ua mavae na faauuina ai foi nisi o tamaiti aoga e 25 i totonu lava o lenei polokalame, lea sa faatinoina i le Te Oro i Glen Innes. E 30 tamaiti sa aofia i le vasega ae na o le 25 tamaiti sa faauuina ona e fai ane le faauuga ua le avanoa le isi toalima ona o tuatuagia faaleaiga. O le susuga ia Tanoai Tai’i Alofipo Reupena Tanoai ma le tofa ia Asiava Tuipea sa gafa ma lenei vasega. Sa auai ai foi se tasi o ulugalii ua silia i le 60 tausaga le matutua ona o le naunau lava ia iloa ma lamalama i le taua o le aganuu. O loo faatauaina i lea vasega le folafolaina o toanai, sula toga, fausaga o le lauga, o le faatinoina o le ava, ma iloa ona faaaoga le gagana Samoa e tautala.

Faailoa e le tofa ia Asiava Tuipea e tele le manaoga o fanau ma tagata Samoa o loo iai, i le fia iloa lea o le aganuu a Samoa, ma o le taua foi lea o le polokalame o le taumafai lea ia tali le manaoga o tagata.