Talepe le tuugamau laga i luga le tino oti ma susunu i le kalasini

“Ua ou sauni e fofola a‘u mau e teena ai moliaga”…Peseta Vaifou

Na faafeiloai e le tusitala le sui faipule o Faasaleleaga numera 4 o loo avea nei ma minisita lagolago o le Matagaluega a le Palemia ma le Kapeneta le afioga Peseta Vaifou Tevaga, a o tauaofia le Palemene i le Aso Lua ua mavae, ma fesili i ai i ona moliaga ua faia e leoleo ona o le taavale a le Malo na ia aveina na fetaui ma se isi taavale i le po o le Aso Faraile 16 o Aukuso 2014.

O se vaega o le aualatele o le Malo i Maluafou na tupu ai le faalavelave. “Ua uma ona ou tulai ma ua ave la‘u tali tetee i moliaga uma a leoleo…Ua ou sauni e fofola a‘u mau e teena ai moliaga a leoleo,” o le finagalo lea o le afioga Peseta Vaifou i lea feiloaiga i fafo o le maota fono o le Palemene i le taimi o le malologa masani a le fono aoao. O le alii loia o Te‘o Richard Tapeni o loo tauaveina moliaga e tolu o le minisita lagolago.

O loo molia i le ave taavale onā ua sili lona maualuga ma le ‘ava malosi faatulafonoina o loo aiaia faaletulafono. O loo molia foi i le ave taavale faatamala ma le moliaga o le ave taavale e aunoa ma se laisene. I se fesootaiga ma le sui Komesina o leoleo i le telefoni le susuga Fauono Talalelei Tapu, na ia faailoa mai ai le oo atu i le ofisa o leoleo o le alii minisita lagolago i le po na tupu ai le faalavelave, faatasi ai ma le ave taavale o le isi taavale na aafia.

Faaalia e Fauono ina ua faia suesuega i le po lea na molimauina e leoleo sa faasuā‘avā le afioga Peseta ma faatonuina ai loa e feula le masini mānava poo le breathalyzer.

O le galuega lea na iloa ai ua maualuga tele le ‘ava malosi na taumafaina e le minisita lagolago. Na faia ai loa le faaiuga e nofo taofia le minisita lagolago i le vaaiga a leoleo, lea na faatoa tatala i tua i le aso Toonai 17 o Aukuso 2014, a o lumanai le Aso Sa o Tamā i Samoa.
O le teena e Peseta o moliaga uma e tolu ua faatulaga ai e le faamasinoga le suesueina o molimau a leoleo i le aso 29 o le masina o Oketopa. O le a valaau ai foi ni molimau a le afioga Peseta Vaifou e lagolago ai lana tetee.

O se tasi lenei o mataupu tau solitulafono tau taavaleafi ua toe aafia ai le minisita lagolago, i le tuanai o se isi mataupu sa molia ai foi i le ave taavale faatamala na mafua ai ona oo le maliu i se tagata, ma o lea faalavelave na tupu i Leauvaa i le lua tausaga ua mavae. Peitai ua mae‘a ona fofogaina le mataupu ma ua toe faaui i tua e leoleo le moliaga ona ua lē lava a latou molimau.