Ole tina lenei ia Pesi Samuelu mai le afioaga o Saasaai ile motu tele i Salafai e aumau ai ma lona toalua ma le la fanau e toalua ile afioaga o Vaitele tai ise fale mautotogi poo le rent. Ole galuega a lenei tina i aso uma e pei ona molimauina ele Talanoa Mai Samoa, e usua’i ai e faatau ana fualaau’aina ile fale lenei i autafa ane ole faleoloa ole Farmer Joe i Vaitele, ae a oo ile afiafi o Aso Sa taitasi ona sii ane lea o ana ulo ole kopai, koko alaisa ma le koko esi ma le faamoemoe e faatau ina ia maua ai se tupe e fesoasoani ai ile aiga.
E leai se isi ole aiga e faigaluega, se’i vagana ai lona toalua e la’upasese i lana tama’i taavale poo le taxi.
Ta’ua e Pesi, ole la taxi na maua ai ise faamanuiaga mo faalauiloa ale kamupani telefoni ale Digicel ile vaitau tonu na faamanatu ai le 50 tausaga ole tuto’atasi ole atunuu, lea e $10,000 le faailoga tupe na manumalo ai ma faatau ai loa le la taxi e fesoasoani ai ile tausiga ole aiga.
Ole tausaga e 2008 na tuua ai Savaii ae malaga mai i Upolu e sailia se manuia mo le fanau aemaise le aiga.
E lē faigofie le aiga pe a fua atu ile taugata tele ole soifuaga ua iai nei ile tau faasoa ole seleni, e $100 le totogi ole rent ile vaiaso, ae ese mai ai le cash power ma le pili ole suavai, o aoga ale fanau faaopoopo iai ma meaai ole vaiaso.
O Pesi ma lona toalua e leai se latou faatoaga ae e lē misi se vaiaso ma le faatau ai le tele o fualaau’aina ile nofoaga lenei, peitai na ta’ua e Pesi, ole latou masani lava e agai ile au faifaatoaga ma faatau mai ai fualaau’aina nei ona toe aumai lea ua toe faatau atu ile atunuu ina ia maua ai se faasiliga laititi mo tupe maua ale aiga.
A oo la ina faaletonu fualaau’aina aemaise ole afā o Gita lea ua faatoa mae’a atu na faaleagaina uma ai mea toto, e matuā pagatia foi le latou faasoa i aso taitasi, auā ose upu e faamoemoe ile taxi, ua lē toe tutusa foi aso ona ua tele foi taavale la’upasese.
Ole manaoga o lenei aiga e fia vave maua so latou fanua e agai e nonofo ai ma atia’e auā ua sau foi le musu e totogi rent, e na’o tupe alu ae leai se lumanai manuia ose aiga e maua mai ai.
Na ave le latou talosaga ile ofisa o fanua ale atunuu le Samoa Land Corporation ile tausaga e 2008 mo se fanua e mafai ona togitogi ae oo mai lava ile taimi lenei e lei maua mai lava se tali.
Ole mau a lenei tina, a lē toaga foi e faatau fualaau’aina i aso taitasi ma ana ulo kokoesi, kopai ma koko alaisa nei, ua lē lava foi le faasoa ile vaiaso.
Auā E le faigofie le sailiga o manuia mo aiga i lenei vaitau ona ua tupe lava mea uma. E malosi foi le loto e faia lenei galuega i aso uma ona ole manatu alofa ile fanau ina ia maua se lumanai manuia ae aua ne’i ola falolo fanau.
Ole talitonuga o Pesi, e faalagolago le manuia o fanau ile lumanai ile alafua e faataatia atu e mātua ile taimi lenei, ma ose tasi lea o vaega oloo faamalosia ai o ia i aso uma, e moni e leai se la faatoaga ae nate faafetaia foi le au faifaatoaga ise avanoa e latou te fai paaga ai mo se tupe maua a si o laua aiga.
O lo’u olaga lea sa iai ile motu tele i Salafai ole fatuaiga lava ma faatoaga peitai ole faigata o Upolu e leai ni o latou fanua e galulue ai, ae atonu e maua se fanua ise taimi vave e amata ai ona atia’e si o latou aiga ma galueaina ai ini faatoaga mo le faamoemoe e tausi ai le aiga i aso uma.
