Ole masina o Mati ole tausaga lenei ole a faataunuu ai le suiga tele e pei ona sa faasalalau mai ai e le pulega o taavale afi ale atunuu, Land Transport Authority poo le Pulega o Fela’uaiga ile Lauelele, e faasā ai ona toe faaaogāina taavale la’upasese amata atu ile tausaga e 2002 agai atu i tua.
O lea faiga na faasalalau mai ai e le LTA ile tausaga na tea nei ona ua o latou manatu ile saogalemu ai ole mamalu femalagaa’i ole atunuu ona ua fai si tuai tele o taavale nei ua matutua i luga ole aualatele.
Ose faiga na ta’ua e se tasi o tamā ua 19 tausaga talu ona fealua’i taxi le susuga Pao Jerry Samania mai Vaivase, e matuā lē fetaui lava, ma ua fai si vavevave tele ole LTA. Ole faagaulemalie o Samania, ona na ia ta’ua e iai nisi o taavale tuai e pei o lana taavale ole 1998 le tausaga ae sili mamao atu le tulaga o iai nai lo isi taavale ole 2004 ma le 2006 ua matuā lē aogā ona toe feoai i luga ole alatele ua fai si faaletonu. Ole taavale lenei e faalagolago iai le aiga mo aoga ale fanau, peitai ole suiga ua sau nei, ia e fai lava ma loimata.
E lē mafai lava ona tali atu ile pulega o taavale afi auā e maimau le taimi e pule lava latou ile suiga o tulafono, ae a fua ile tulaga taugata ole pasiga o taavale, faalua ile tausaga, leaga aualatele faatasi ai ma le faaletonu tele ole tau o pasese, e matuā lē fetaui lava. Sa tatau lava ona toe silasila ane le pulega ile tele o nai aiga lima vaivai e faalagolago le tausiga i nai taavale nei na faameaalofa mai e aiga i atunuu e mamao. O nisi o aiga e oo mai ile taimi lenei e lei mae’a lava ona totogi le loan sa faatau ai le taavale a’o lenei ole a lē toe aogā mo se tupe maua.
Saunoa Pao Jerry Samania, ole fale taavale oloo tu ai lana taavale ile taimi lenei, DB Taxi Stand i Vaivase e oo atu ile 8 taavale la’upasese oloo aafia ai ile suiga lenei, ma o nisi o avetaavale ua amata ona suesue solo se isi fesoasoani e maua ai se seleni mo le tausiga o aiga, ua oo lava le mafaufau ile faaono saili ose isi galuega e maua ai se tupe mo aoga ale fanau.
E lē o toe tutusa foi tupe maua mo taxi la’upasese ile taimi lenei ona ua fai si tele o taavale ale atunuu aemaise lava ua toeititi tofu le aiga ma le taavale, saunoaga lea a Samania.
Ose tasi o itu na faaalia ai le faagaulemalie o Samania, ona ole lē tutusa ole faiga ua faia nei i taxi la’upasese ma pasi la’upasese. Ole tele o isi pasi la’upasese ua fai si tuai tele ole tausaga, 1986 poo le 1990 a’o lea lava e faataga i luga ole aualatele, ae e toatele atu tagata e tauave e le pasi nai lo le taxi la’upasese.
Ole manatu o Samania, sa tatau lava ile pulega ole LTA ona tausisi pea ile latou tulafono na sau a’i, e faatoa aveese lava le taxi la’upasese pe afai ua lē pasia ona toe fealua’i ai i luga ole auala.
E lē taliaina foi e Samania le auamai ai oni mita mo taxi la’upasese, ona o lona manatu e aogā lava mo atunuu i fafo, ae le aogā mo Samoa, ona o itu la nei, afai ose pasese ose tina matua poo se toeaina, ae faapea mai e na’o le $12 tala lana tupe, o lona uiga e uma loa le malosi ole $12 ile mita, ua tatau foi la ona tu loa le taavale ae oso i fafo peitai e lē mafai ona tupu lea tulaga i avetaxi ona ole tatou aganuu ma le avafatafata.
Ose tasi lenei o mataupu oloo taatia lava ile taimi lenei ma ua leva foi na faagasolo ai ni faatalanoaga ale pulega, ole faia lea oni mita mo taxi la’upasese.
Oloo tālia ile taimi nei se talosaga a Samania ma lona toalua ise tasi o faletupe mo se seleni e faatau ai se taavale e tusa ai ma le suiga fou ole tulafono, ae ole a faa private loa le taavale lenei auā o lea ua faasā mai e le LTA pe a aulia atu le masina fou.
