Ole malaga ale taitai ole Malo talu ai nei i Ausetalia e tatala le ofisa fou ole Haikomesina o Samoa ile laumua o lea atunuu o Kenepera na maua ai ma le avanoa e saunoa ai le alii palemia susuga Tuilaepa Lupesoliai Sailele Malielegaoi, ile mamalu o tagata Samoa na auai, ile mataupu ole tagatanuu poo le sitiseni. Ina ua taliu ile atunuu le taitai ole Malo na ia faailoa ai i lana faatalanoaga masani i luga ole leitio ole 2AP le mafuaaga na talanoa ai ile mataupu.

“E iai le manatu sese foi lele e taofiofi pea o latou sitiseni Samoa ma taofiofi ai ma o latou Tusifolau. E leai lava se mea e taofiofi ai o latou tusifolau Samoa auā o tatou e mafai ona 3 pe 4 sitiseni”. Na faamalamalama e Tuilaepa e iai atunuu e le mafai ai le tulaga lea, e pei ole atunuu o Siamani lea na toe o atu ia te ia ni tagata Siamani na ave iai o latou sitiseni Samoa, ma toe talosaga e aveese le sitiseni Samoa ona o tulafono a lo latou atunuu e sui loa le tagatānuu le toe agavaa loa ile sitiseni Siamani.

“E le faapena la tatou, auā o tatou e mafai ona lua tolu fa sitiseni i lalo o tatou tulafono”. E ala na ou unaia le mataupu lea mo le puipuia o lo latou nonofo i o, auā a aafia ini solitulafono ae maua ane e lei sitiseni e faigofie tele ona toe tipoti mai”.

Faaalia ele Palemia ole toatele o tatou tagata e le ole lotonuu e mafua ai ona talosaga le sitiseni ae ole musu e totogi le talosaga. Ole isi mafuaaga e le talosaga ai ise sitiseni ona o isi oloo fai a latou lapiti laiti e pei oni pisinisi ta laau.  Ole taimi e oo ai ini tulaga faaletonu tau tupe ae saili atu e tele seleni oloo teu i faletupe ae oloo fai le pisinisi e aunoa ma se laisene. Ole mafuaaga ua iai tagata ua lē maua ni penisione litaea ona e leai se sitiseni.

Na faailoa foi ele Palemia e iai se mataupu i Ausetalia na aafia ai se atalii ose ulugalii Samoa oni feseeseaiga ma se alii papalagi Ausetalia ma oo ai le mataupu ile faamasinoga. Ole fesili muamua ale faamasino poo le ā le tagatānuu oloo umia ma ina ua faailoa ele alii na molia ole tagatānuu Ausetalia na muta ai lava ae ana leai se sitiseni e faigofie ile faamasinoga a lena atunuu ona fai loa le iuga e toe aumai i Samoa.

Faaalia e Tuilaepa o taimi uma e malaga ai i fafo ini fonotaga ma nisi fuafuaga nate saili ai ni mataupu e aogā mo tagata Samoa o nonofo i atunuu i fafo ina ia maua ai lo latou malamalama i sootaga ole Malo o Samoa ma na atunuu.

Comments

comments