Talanoa Aoga Maualuluga i fesootaiga televavave ma aafiaga o fanau

E 70 Aoga Maualuluga (Secondary Schools) na usuia se latou fonotaga i Fiti auā le talanoaina o aafiaga o fanau i fesootaiga televavave faaonapo nei ma puipuiga e ao ona fai ina ia mautinoa e gasolo lelei lo latou faaaogāina o nei tomai.

Mo Samoa, e toalua tamaitai aoga o le Kolisi o Samoa na filifilia e agai i Fiti mo lea fonotaga, ma na o la laga ai le tulaga o iai aafiaga i Samoa lava ia, o fesootaiga nei e pei o telefoni feaveai ua matauina ai le tele o fusuaga ua tulai mai i le va o aoga ona o fe‘au e lafo solo (texts) ua aafia ai finagalo o fanau aoga ma tulai mai ai feeseeseaiga i tausaga ua tuanai.

O le isi lea mafuaaga o le tele o vevesi tulai mai i le va o Aoga Maualuluga i tausaga ua tea o fetusiaiga ia e faia i luga o telefoni. E le gata i lea ua iai foi ma fesootaiga ia e felafoai solo i luga o internet poo fesootaiga ia e ta‘ua o social media i le facebook ma isi ituaiga fesootaiga ua tele ata lea ua faaali ai ma ua aafia ai lava le toatele o fanau aoga.

Ua tele foi le taufaamata‘u ua vaaia ai i luga o nei fesootaiga e pei ona molimau ai isi aoga i atumotu eseese o le Pasefika na faapea ona aofia uma i lenei fonotaga mo tupulaga talavou o le itulagi.

Ua tele foi moliaga ua oo i luma o le Faamasinoga i Samoa lava ia e faatatau i ata leaga ua faalauiloa i luga o internet ma o le popolega tele lenei o ofisa o Aoga a le Pasefika o le maua e fanau o nei ituaiga fesootaiga.

O le tele o aoga o loo ua faamalosia aoga faa computers ua iai tuutuuga e taofi pe poloka ai e kamupani o loo faatinoa fesootaiga televavave faapea le tulai mai o ni tulaga faapea, peitai o loo manino e lē o mafai ona taofia telefoni feaveai e lafo solo ai nei ituaiga ata ma faaupuga masoā ma le lē lelei i fanau.

Ua faatulafonoina foi i le tausaga lenei e le Matagaluega o Aoga le faasā ona toe vaaia se tama poo se teine aoga o feaveai ni telefoni feaveai i le taimi o aoga ma e ao uma lava seia tuua le aoga ona faatoa mafai lea ona faafoi telefoni a le fanau e faatatau i fesootaiga ma mātua i le taimi e tuua ai.
O lea la ua faalautele aoaoga nei mo fanau talavou a le Pasefika e aofia ai Samoa, ma o sui o Samoa na faailoa le tulaga o iai galuega i le atunuu lava ia ina ia tau faamautu ai ni puipuiga o fanau aoga mai itu e leaga ai fesootaiga televavave e pei ona ta‘ua.

O loo iai lava foi fanau e lē o usitaia tulafono o telefoni feaveai i totonu o aoga e pei ona ta‘ua e isi atunuu o le Pasefika, ma ua agai foi i le faamalosia o tulafono ina ia mautinoa le saogalemu o fanau aoga.

O le finagalo autasi o lea fonotaga na usuia i Fiti ina ia maua e fanau aoga le malamalama e Nisi o fe‘au e vaaia i luga o internet ua aafia ai fanaualo ese ai mai i le maua o nei ituaiga fesootaiga faapea ma ia atamamai e aua ne‘i ave le faamuamua i ia uiga i taimi o aoga ae ave pea le faatāua i aoaoga e tatau ona faaaogā ai nei tomai ua mafai ona maua i totonu o atumotu laiti o le Pasefika.