Ua faamautu maliu e lua i le vaiaso na tea nei i lipoti o faalavelave tulai mai i le atunuu.
O le faalavelave muamua i le Aso Tofi na se‘i mavae atu nei na maliu ai se tina e 62 tausaga le matua o le pitonuu o Faga i Siufaga i Savaii. O lea tina na ta‘ua e le Ofisa o Leoleo na agai mo sana faamaluga i gataifale lava o le afioaga.
O ina na tulai mai ai le faalavelave ma na malemo ai le tina ma aumai ai i Tuasivi i le falemai i lea afioaga ma faamaonia ai le maliu o ia.
E lē o iai nisi tulaga masalomia o le maliu o le tina ae o le vaiaso lenei o loo faatautaia ai se taotoga faapitoa ina ia faamautu ai le mafuaaga tonu o le malemo o le tina, pe na oso sona gasegase pe leai foi.
E pei foi ona lipotia muamua atu ua tulai mai pea le toatele o le atunuu ua aafia soifua a o iai i gataifale o le atunuu ma o loo tālia le taotoga e faamautu ai pe na tulai mai se isi faalavelave na mafua ai lava le malemo o lea tina.
O le isi maliu o se alii e i le va o le 26 i le 30 tausaga le matua mai i le afioaga o Iva i Savaii lea na ta‘ua e le Ofisa o Leoleo na maliu i le amataga o le vaiaso ona o manu‘a tuga o lona ao.
Faaalia e lipoti a le Ofisa o Leoleo o se fusuaga na tulai mai i le va o lē ua maliu ma se alii talavou o Iva Savaii lava, ae oso ai se alii na molimauina lea vevesi ua faapea lipoti ua tu‘i le ulu o lē ua maliu i se maa.
Na faatatope mai lea alii i le vaveao o le Aso Sa i le Maota Gasegase i Tuasivi ae lei maua ai se toomaga ma toe aumai sa‘o ai i le Falemai tele i Motootua i Upolu.
E ui i taumafaiga e laveaia lea alii, ae na ta‘ua e le lipoti a leoleo e lei manuia ona o loo masalomia le matuā ogaoga o manu‘a i le ao o lea alii. O le aoauli o le Aso Gafua na maliu ai lava o ia.
Ua molia le alii na faia le osofaiga i le fasioti tagata ma o le a tulai i lenei vaiaso i luma o le Faamasinoga Maualuga.
O loo taulamua lava solitulafono o le faaoolima, faaoo manu‘a ma le gaoi i le lisi o solitulafono i lea vaiaso ma lea vaiaso i le Matagaluega o Leoleo ma Falepuipui.
O lala uma o le Matagaluega i Upolu ma Savaii ua lē ‘asa ai le lipotia o ia ituaiga solitulafono.
E eseese lava mafuaaga ua ta‘ua e leoleo e tulai mai ai ia solitulafono aemaise lava sauāga i totonu o aiga lea ua tele ina fesootai ma le ava malosi, ma le isi o le lē lava o le faasoa ma vevesi ai aiga.
Ua faaopoopo ai foi ma le lē faamaoni i va faaleulugalii.
O nisi o mafuaaga na ta‘ua e leoleo o loo unaia pea i polokalame o loo agai atu i ai le auaunaga i afioaga i vaiaso taitasi ina ia taumafai e tuu itiitia, ma ua mautu foi le vaega o le Matagaluega lava ia ua feagai nei ma faafitauli i totonu o aiga.
O le isi unai a leoleo ua vaaia ai le amata ona lapatai ma faamalamalama i fanau aoga a o laity, le tāua o le puipui o le aiga ae lē o le faaoolima, ma o se taumafaiga ua manatu le Matagaluega a amata ona totō i manatu ma mafaufau o le fanau, atonu o le a faaitiitia ai le tulai mai pea o nei faafitauli i le lumanai e pei ona vaaia pea i vaiaso uma i Samoa nei.
