O le faamanatuina ma le faamamaluina o i latou sa maliliu i le taua muamua ma le taua lona lua o le lalolagi i tausaga taitasi o se feau tāua lea e toe manatunatu ai atunuu uma o le lalolagi ia i latou sa ofoina o latou soifua i le tāua. O tausaga uma lava e faamanatuina ai e le itu i Sisifo o Aukilani le ANZAC day, o le Aso Faraile, aso 25 o Aperila na tumutumu ai le taulaga faatau i Avondale i le taeao e faatali le taimi e amatalia ai le savali e pei ona masani ai i tausaga taitasi.
O se aso timu ma loulouā ae lei tuua ai le fia mafuta o le toatele o le atunuu i le fia lagolago i lenei faamoemoe. E ‘afa le iva i le taeao ae amata loa ona faagasolo le savali lea sa amata mai i luma o le RSA i Avondale.
O le failipu a le ekalesia PIC i Avondale na latou taitaia lenei solo tele ma o latou foi e nafa ma lenei faamoemoe i tausaga taitasi. Na poloka uma feoaiga o taavale i lea pitonuu a o alu atu le savali e agai atu i le nofoaga o loo iai fanuatanu i St George St.
O alii ma tamaitai leoleo, o fanauaoga mai le kolisi i Avondale ma le aoga tulagalua i lea lava pitonuu, o sui o le Ami faapea ma tamā ma tina matutua o atunuu eseese sa auai i lenei faamoemoe. Na taunuu le solo i le nofoaga o loo iai fanuatanu ona faataunuu lea o le sauniga na taitaia e le susuga i le faafeagaiga ia Edmonds Namburi mai le Ekalesia Papatiso.
O se sauniga mamalu lona faatinoina aemaise o le taimi na iliina ai le pu e le susuga ia Pena o le failipu a Avondale e faailoa ai le faaaloalo uma o tagata ma manatumanatu i le tāua o lea aso.
O le toatele foi o tagata o le atunuu i lea taeao sa tapena teu fugalaau e ave i luga o tuugamau o i latou ua maliliu e mafua ai lea aso faapitoa. Na taualuga polokalame o le aso i le usuina o le vii o le malo o Niu Sila lea sa taitaia lava e le failipu a le ekalesia PIC Avondale.
Na mae‘a le sauniga i le fanuatanu, ona toe sau lea o le solo e agai atu i le RSA i le nofoaga sa amata mai ai le savali ma faataunuu ai le taumafataga o le aoauli sosoo atu ai ma le taumafataga i le afiafi.
