Faauuga Voice of Christ Bible School
O le taimi o le seleselega ua galo uma ai tiga ma faigata sa galue ai, mou ese le vaivai ina ua tini lau o le tausinioga sa tauasa mai ai i le lua tausaga.
Ae o se taeao fou foi e toe tu ma tepa ai i tua i le alofa ma le agalelei o le Atua a o tauivi ma finau ai i le saili ma le faalauteleina o le malamalama e ala i le afioga a le Atua.
O le afiafi o le Aso Faraile 24 o Iulai na faauuina ai nisi o alo ma tamalii o le atunuu o ē sa aotauina i le afioga a le Atua i le aoga Tusi Paia a le Voice of Christ Bible School i Magele.
O le sini ma le faamoemoe maualuga o le aoga o le aoaoina o fanau ma nisi o susuga i faafeagaiga i le faatinoina o le galuega a le Atua i totonu o Ekalesia, e ala lea i le folafolaina o le Upu a le Atua a o galulue ai i totonu o isi itutino o le Ekalesia, e pei o autalavou, mafutaga a tamā ma le mafutaga tina. E toafitu i latou ua faauuina i le tausaga lua i le tusipasi o le Diploma of Theology ae 13 o loo auai i le tausaga muamua.
O le taulaga o le faafetai ma le viiga i le Atua na pepese ai lana fanau e patipatia faatasi ai taumafaiga a sui aoga e pei ona punoua‘i ai i le lua tausaga. Sa auai aiga uma o sui aoga, faapea susuga i faafeagaiga ma ekealesia eseese o le Voice of Christ i totonu o Niu Sila, ae lē gata i lea sa faatasi mai ai foi le Peresetene aoao o le aoga mai Amerika Samoa ia Dr Rudolph Tilo ma lona faletua.
O se sauniga mamalu ma le matagofie a o tulai ai le susuga i le faafeagaiga ia Mata Junior i le taitaiina o le viiga. O le tatalo amata na fofogaina e le susuga ia Vaimili Alefosio o se tasi o sui faauu, ae o le faitauina o le afioga a le Atua na saunoa i ai Pastor Malaki Taefu ma Jonathan Su‘a.
O le tumutumuga ma le maualuga o lea po, o le upu faauuina a le Atua na saunoa i ai le Peresetene aoao o le aoga ia Dr Rudolph Tilo, na ia faamalosi ai i le aufaauu aemaise o le auvalaaulia i ni vaega se tolu:
(1) Tapenaga (2) Onosai (3) O ma le manuia, ia lelei le tapenaga mo le galuega a le Atua, onosai i mea e tutupu ma ia aoaoina nei e fai ma auauna. Na sosoo ma le tufatufaina o tusipasi mo i latou i le tausaga lua e le taitai o le Ekalesia i Niu Sila ma Ausetalia le susuga ia Rev Uilisone Taito, ma faaiu ai i le sauniga i le tatalo faapitoa mo i latou ua faauu, ma tatala ai loa le avanoa mo aiga ma uo e feiloai ai ma faaula.
O loimata o le fiafia ma le loto faafetai i le Atua sa molimauina i lea afiafi. Sa faapea foi ona saunia le taumafataga i lea po e le susuga i le puleaoga ma faiaoga faapea le aufaauu auā se faamalositino mo susuga i faafeagaiga ma le auvalaaulia sa auai.
O le aoga lenei a le Voice of Christ Bible School o le lala muamua lea o le aoga o loo i Aua i Amerika Samoa, ma o le faauuga muamua foi lea a le aoga talu ona faavae mai.
E fā kuata o le aoga i le tausaga, ma e fā foi mataupu o loo aoaoina ai i le kuata, o Rev Elder Uilisone Taito ma Pastor Isara Heperona o loo aoaoina le mataupu o le Christian Ethics, o Pastor Mata Junior ma Pastor Nofoaiga Mose o loo aoaoina le Pneumatology, o Rev Elder Peter Lilomaiava o loo tauaveina le Bible Survey ma le susuga ia Pastor Tomasi Taito o le puleaoga o loo aoaoina le Systematic Theology.
O le Aso Sa nei o le a tatala aloaia foi le kolisi a le aoga lenei ua faaigoina o le T.K.T Lighthouse Bible College i Magele ma o le a tauaveina ai le AA ma le BA ma le faamoemoe o lea kolisi o le a mafai ona toe aooga ai nei sui aoga ua uma ona faauu ma faasafua ai foi le avanoa mo isi ekalesia e fia auai. Suafa o le Aufaauu 2015:
Pastor Tuiletoa Tuilaepa
Pastor Malaki Taefu
Vaimili Alefosio
Andrew Mata
Tavita Su‘a
Isaia Nikolao
Jonathan Su‘a
