Ole galuega tau logologo a tusitala male au faasalalau e ta‘ua ile gagana peretania o watchdogs poo taifau leoleo o pulega faatemokarasi. Peitai na faamatala ele afioga Patele Ponifasio ole Matagaluega a Mauga ma Samalaeulu i sana tala a‘o iai i Italia mo a‘oa‘oga, sa valaaulia ise aso fanau ose tasi o faifeau Ositaulaga ni sui tusitala ma faasalalau o lea atunuu ae saunoa ai se tasi o faifeau e faapea o tagata tusitala ma faasalalau o taifau sasau.
Na faamatala ele afioga Patele Ponifasio lea tala e momoli ai se feau ile sauniga na taualuga ai le masina ole faatāua ele ekalesia Katoliko i Samoa ole tāua o fesootaiga. Na ia faamatala ai foi e faapea na fai le tala a lea faifeau Ositaulaga e mafua ona ia faamatalaina tusitala ma tagata faasalalau oni taifau sasau, ona e soo se mea lava e sosogi iai o latou isu. “Oute faamalulu atu ile paia ole autusitala ua tatou mafuta i lenei afiafi, e lē faapea o aveesea ai i la‘u tala ua faamatala atu le tāua ole tou galuega”.
Ole sui Peresetene ole JAWS le faalapotopotoga o tusitala male aufaasalalau a Samoa, sa taitaia le aumalaga a nisi o sui ole asosi sa auai e tali le valaau faaaloalo mai le televise ale Ekalesia Katoliko i Samoa ina ia faatasi atu ile taualuga ole masina o polokalame sa faatāua ai fesootaiga.
E maua lava le toasefulu ma ona tupu o sui sa malaga mo lea faamoemoe, ae na taia loa le faafofoga ile tala i tusitala Italia ma taifau sasau, na lagona le leo ole faanoanoa i nisi ole aumalaga.
“Pau lava lea ole faaupuga pei ua ka feel lē lelei ai”, ole talanoa mai lea ase tamaitai tusitala ose nusipepa sa malaga ai. Sa fesiligia le afioga Patele Ponifasio i sana silasila ile tele o lipoti a tusitala ole lalolagi ua oia ai le lotoifale ole Katoliko ona o nisi o mataupu maaleale ua aafia ai nisi o taitai male aufailotu ole ekalesia.
Na faaalia e Patele Ponifasio ole tiute tāua lea ole galuega faatusitala ma faasalalau ae o lana fautuaga ia faia male amiotonu ma ia mautinoa oloo sa‘o faamatalaga e momoli i tagata.
Na taualuga le polokalame ale ekalesia ile Aso Toonai, 24 o Setema ise sauniga ole Misasa Paia, ma faaaloaloga sa faapea ona faasopolia ai uma Matagaluega e valu ale Katoliko i Savaii atoa, faapea male Vikaliatu a Puleono i Salafai.
Sa liliu foi le ekalesia ma faia faaaloaloga mo sui ole aumalaga ale asosi o tusitala male aufaasalalau a Samoa.
O teutusi o seleni ma palapala a Malo sa salani ai faaaloaloga uma.
