Tai “Bam Bam Pe’a” Tuivasa UFC 225

Tai Tuivasa
Tai Tuivasa

O le vaiaso nei i le Aso Toonai, aso 9 o Iuni e ulufale ai Tai Tuivasa e tauva i le UFC 225 i Chicago, USA i le fusuaga ma Andrei Arlovski o Belarus. O le fusuaga karate feifiloi lea ua lauiloa ai le alii Samoa mai Ausetalia. Ua fitu ana fusuaga aunoa ma le faiaina talu ona liliu faapolofesa i le 2012. A’o Arlovski e 27 manumalo ma faiaina e 15.

O le 2004 na amata ai Arlovski i le UFC faatusa lea i le 2012 mo Tuivasa. O lona uiga e fai lava si vava mamao o le poto masani a le paga lea, o le faitau a le ‘au matemate e ao ona manumalo Tuivasa i le fetauiga lea. O le eseesega e aupito sili ona taua, o le eseesega o tausaga o le toalua lea o Arlovski ua 39 tausaga faatusa i le 25 o tausaga o Tuivasa.

I le faatusatusaina o sikaili, o le 63% of fusuaga a Arlovski na manumalo i le KO. Ae e vaeluaina faiaina ma manumalo i ana fusuaga e sefulu lata mai. I le faasoaina o ana aupega e 3.23 tu’i mamafa e sao i le minute e tasi ae 42.9% o ia tu’i e sasa’o (accuracy). A’o le isi aupega i le UFC o le pue o le paga ma tauivi i lalo (takedown) e na’o le 0.56 le faitau mo Arlovski i le fusuaga e tasi.

Faatusa lea ia Tuivasa ua 9-0 manumalo. E sili mamao ana tu’i mamafa e togi i le minute e tasi e 8.72, ma le sasa’o o ia tu’i e 68.9% (42.9% mo Arlovski). A’o le faitau matautia mo Tuivasa na manumalo i fusuaga uma ia i le KO i taamilosaga amata o ana fusuaga.

O le lelei o le fusu a Tuivasa o le fusu lea i luga, ma le lelei o le tuufaatasia ma le faasoaina o ana tu’i. Pau le aupega e tau vaivai ai Tuivasa o le pii lea i lalo e leai se faamaumauga mo ia i lea tulaga. E lei palasi faatasi i le tapoleni Tuivasa, o lona uiga a feiloai ma se tasi e mafai ona faapiiina le Samoa mai Ausetalia e ono ese le tulaga e oo iai le taaloga.

Ua fai sina leva talu ona sainilima Tuivasa e fusu i le UFC, o le masina o Novema 2016 na saini ai le feagaiga. Peitai, e atoa le tausaga ma le afa o faapelepele le manu’a matuia na ia te ia i lona tuli, ma isi manu’aga na mulimuli mai. Na faato’a sami le feagaiga i le fusuaga muamua i lalo o le UFC i le masina o Novema ile tausaga ua tea (vs. Coulter KO).

O Tuivasa na fanau o ia i Ausetalia. O le tina o lona tina ose tamaitai Apoliti a’o lona tama o le tamalii Samoa. I le malo ai o Tuivasa i le fusuaga a le UFC Novema 2017, ua avea ai o ia o le uluai tagatānuu moni (indigenous) o Ausetalia ua manumalo i se fusuaga a le UFC.

O le fusuaga na sosoo ai o le masina o Fepuari 2018 (vs. Asker TKO). I le mae’a ai o lena fusuaga na saini ai tausaga faaopoopo e fa e fusu ai o ia i lalo o le UFC. Mai lea foi taimi na faitau ai loa o ia i le lisi a le Paga Mamafa a le UFC i le numera 15. I le faitauga lata mai ua see ai Tuivasa i le 12.

Ua toalua ai nei Samoa i le Paga Mamafa a le UFC, o Tuivasa ma Mark “Super Samoan” Hunt. O Hunt o loo i le numera 6 a le UFC.

Fepuari 10, 2018 WIN vs Cyril Asker Round 1

Novema 2017, WIN vs Rashad Coulter Round 1

Oketopa 2016, WIN vs James McSweeney Round 1

Iuni 2016, WIN vs Brandon Sosoli Round 1

Tesema 2015, WIN vs Gul Pohatu Round 1

Novema 2012, WIN vs Erika Nosa Round 1

Aokuso 2012, WIN vs Aaron Nieborak Round 1