Tagisia e Ioane Suapula lau fesoasoani Samoa

O Ioane Suapula ma si ona toalua ia Christine ma si a la fanau ia David ma Aletina
O Ioane Suapula ma si ona toalua ia Christine ma si a la fanau ia David ma Aletina

E lē faigofie ia Ioane Suapula ma si ona toalua ia Christine le tulaga faigata ua agai atu nei iai si o la aiga tau amata, ina ua faafuasei ona maua le tamā ole aiga ia Ioane ile gasegase faigata ole Kanesa o ponaivi poo le Bone Marrow Cancer.

O Ioane Suapula e mai le afioaga o Luatuanuu na malaga mai i Niu Sila ile 2007. Ole tausaga e 2012 na faipoipo atu ai ia Christine Suapula. E toalua o la alo, o David faatoa lua ona tausaga ma si a la pepe teine faatoa fā masina le matua ia Aletina.

Na ta‘ua e Ioane o ia e lē maua ise gasegase, o lona olaga e toaga tele e faigaluega. O lona faamoemoe autu lea ole galue malosi e tausi lona aiga aemaise si ana fanau. “Ole isi aso na ou lagona ai le tiga o lo‘u tua, sa ou manatu ua mapuna lo‘u tua mai le galuega ole mafuaaga lea na ou alu e vaai la‘u fomai mose fualaau e fesoasoani ile tiga o lo‘u tua,” ole faamatalaga lea a Ioane.

E lua vaiaso o inu e Ioane fualaau seia oo lava ina uma le pepa fualaau, auā ole faatonuga lea ale fomai, e tatau ona inu ia uma fualaau.

“Ole isi aso na piliki mai ai le toto i o‘u aulamu, sa ou lē iloa pe aisea ua tupu ai lea mea ia te au.” Ole tala lea a Ioane, na alu e vaai le fomai nifo, peitai, na faatonu o ia e alu sa‘o lava ile fomai faapitoa o nifo i Middlemore. O iina na sue ai le mafuaaga ole piliki o ona aulamu, ma ia maua ai le tala o ia ua aafia ile kanesa o ponaivi poo le bone marrow cancer.

Ose tala na faigata ia Ioane ona ia talia, aemaise o aafiaga ole a oo iai si ona aiga, auā ole gasegase ua aafia ai nei ose gasegase faigata tele e tusa ai o faaaliga a fomai. O fualaau sa inu e Ioane e fesoasoani ile tiga o lona tua, ua mafua ai ona maua o ia i lenei gasegase.

E talitonu Ioane e lei manino lelei le faatonuga ale fomai na tuuina mai ia te ia. Ona e pau le tala ale fomai e tatau ona inu ia uma le pepa fualaau, peitai, ina ua fesiligia le fomai, na ta‘ua ai o fualaau nei e lē tatau ona inu faalausosooa, faatoa inu pe a lagona le tiga ole tua. E ui ose sasi ile inuina o fualaau, peitai, ua matuai aafia ai le olaga o Ioane ma si ona toalua aemaise si ana fanau ona o lenei gasegase ua maua ai.

Ole gasegase lenei ole Bone Marrow Cancer e lē faigofie ona togafiti, ae ose gasegase foi e faaeteete gata tele. Ole bone marrow poo le mea lololo foi lea ei totonu ole ponaivi, o lana galuega ole gaosi lea o sela papa‘e ole tino (white cells) o sela papa‘e nei e puipuia le tino mai ma‘i, a faaleagaina bone marrow, ua lē mafai ele tino ona toe gaosia sela papa‘e, o lona uiga ole a faigofie ona apoia le tagata e soo se faama‘i. E lē gata i lea e lagona lava ele tino le suiga tele e pei ona molimauina e Ioane.

E tasi lava le togafitiga e mafai ona aogā mole gasegase lenei, ole sailia lea ose tagata e tutusa marrows poo mea lololo i totonu o ivi, e aumai la sina vaega itiiti mai le tino ole isi tagata lea e togafitia ai le tagata ua gasegase. I faaaliga a fomai e na ole 25% le avanoa e mafai ona maua ai se tagata e tutusa bone marrows.

Na ta‘ua e Ioane ua mae‘a ona aumai toto o tagata o lona aiga mai Samoa, e sue iinei pe iai se isi o lona aiga e maua ai se fesoasoani mo ia, afai e leai, ole a agai loa sailiga i tagata lautele.

Na ta‘ua e fomai o tagata Samoa ma tagata Pasefika e ono maua ai se fesoasoani pe a leai se fesoasoani e maua mai tagata ole aiga o Ioane.

E tele itu faigata ua feagai nei ma Ioane ma si ona aiga, ua faafuasei ona motusia lana galuega, ua lē mafai ona toe faigaluega ona o faaeteetega o lona gasegase, osi ona toalua oloo malolo foi mai le galuega ona o lea faatoa ola si a la pepe teine, ma ua faailoga fesili ai mea uma mo ia ma si ona aiga.

Na ia ta‘ua foi tulaga faigata o lona gasegase, ona e foliga lava e malosi ma leai se ma‘i o maua ai i taimi uma, peitai, a oo ina oo mai tiga ole ma‘i, o lona mapusga ole falemai lava. Na ia ta‘ua foi o lea ua savalia le 4 masina o feagai male gasegase, ma ua amata foi ona ia maitauina taimi e oso ai lona ma‘i, ona faataalise foi lea ile falemai mo se mapusaga.

Ua talosagaina ai lau fesoasoani Samoa mo Ioane ma lona aiga, e lē gata mo nisi e sueina o latou toto, ae o soo se fesoasoani lava e mafai ona maau iai mo si nei aiga mafatia. O Samoa e aiga uma tagata, o Samoa ole atunuu e matua faitama e talosaga atu ai mo lau fesoasoani.

Ose taimi o muamua ona faalauaitele atu lea o nisi o taumafaiga ma auala o fesootaiga mo ni fesoasoani mo Ioane ma si ona aiga, ae mole taimi nei afai e mafai ona fesootai mai ile 027-2764417 mo nisi faamatalaga poo se fesoasoani foi e foaina mo Ioane ma lona aiga, poo le faamauina foi o lou suafa mole sailia o lou toto pe maua ia te oe se fesoasoani mo Ioane.