“E lē o aso uma e maua ai a matou vai. E ui e na ole 15 minute le mamao ole matou fale mai le taulaga o Apia o tele ai suavai, ae tate lagona lava le fia inu ise vai mamā.”
O lenei faaletonu e tumau lava i taimi e mamate ai magāvai sa feinu mai ai, ua avea foi ma mafuaaga, ua lē mafai ai ele fanau ona maua se mafutaga lelei male tamā ole aiga. Ua maliu le tina o momoo i sana tane vai, ma ua tausavali mai nei le tamā ia Ulugia mase vaega ole fanau male aufaigaluega mo Falemauga.
O Falemauga e taoto maualuga mai gauta o Tapatapao, e silia ile 30 aiga oloo nonofo ai, ma malumalu e tolu e aofia ai le AOG ma le Metotisi.
O na aiga oloo ola mai vaitali ile timu talu ona nofoia o latou fanua ile silia male 30 tausaga. Molimau a Ulugia sa masani ona ola mai lona aiga, ise punavai mai le mauga i gauta, e itula le mamao male latou fale. Na mafai ona aualā iai mo se taimi lē tumau. Ae a oo lava ina mugalā ona mate foi lea e pei ona faaletonu talu mai le amataga ole tausaga.
“Ta fia fai tanevai Koluse Mumu”
Ua sulufai atu ai nei ile Koluse Mumu le tele o aiga, e pei ona oo atu foi iai male talosaga tusitusia ale tamā ia Ulugia mose tanevai a lona aiga. Ise vaega o lenei tusi talosaga oloo faapea mai:
“Pagā lea ona oloo iai lava le maa tuta‘ia ole agai i luma o nei taumafaiga, talu ai ole tele o taimi e leai se suavai e maua. Ae a maua foi timuga, e lē mafai ona lava atigipaelo ma kalone e faatalitali ai ni vaitimu, ina ia umiumi atu se taimi e faaaogā ai.”
“Oloo tālia foi se pepe fou i lo‘u aiga, ua alagatatau ai ona faamautu se auala e tali ma faaputu iai nai a matou suavai timu. Ua moomia ai lava sina tane vai mo matou faamolemole, pe a lavātia e lau faasoa.
Ose fiafiaga tele lena ona e lē gata ina e siitia ai le soifua maloloina o lo‘u aiga, ae ole faaleleia atili ole faatoaga oloo matou faatino ai se tautua i o tatou tagata lautele.”
Saunoa le tamaitai Failautusi Aoao, Susuga Namulauulu Tautala Mauala, “E toatele le mamalu ole atunuu oloo fia maua ni tanevai, e tauala atu i taloasga. Ua oo atu ile 600 talosaga mai tagata taitoatasi ae tusa ole 50 talosaga e mai aiga mo ni tanevai ile taimi nei.”
Na saunoa Namulauulu, ua taumafai atu le Koluse Mumu ini auala ina ia faamalieina ai le manaoga ole atunuu lautele. Ua faamauina foi e tele lava aiga mai Falemauga ua i luga ole lisi a latou talosaga.
Lagolago i atinae ale malo
O faatanoavai fou nei ua mae‘a fausia ile tuaoi o Falemauga ma Tapatapao. Peitai e lē o atagia mai e manuia ai aiga e nonofo i fanua oi luga atu e pei o Falemauga. Ole saunoaga a Ulugia i lona lagolago ile unai ale malo ina ia toe agai i uta tagata e atina‘e laufanua. Ae o lona manatu, afai ole finagalo ole malo ina ia atinae auala ma faatoaga, ua tatau foi ona ave le faatāua ile suavai. Pei ona aumai ai fesoasoani ta‘ifia miliona mai malo ole atu Europa e faaleleia ai sapalai mo suavai i Samoa.
