E ui i le louloua o le tau i le faaiuga o le vaiaso, ae e lei taofia ai se tasi o matati‘a ua vaaia i Samoa i le itu tau i taaloga.
O le tuuga aau muamua lea ua faatautaia e le asosi o taaloga faavaomalo a Samoa, le Samoa Events. Na fai muamua foi e se isi asosi le taumafaiga faapea, ae o le taimi muamua lenei ua mafai ai e le asosi o taaloga faavaomalo ona faatino lea faamoemoe.
E lua ‘au ma tagata taitoatasi e toalima na tausinio i le fe‘ausiga lenei ma na amata atu i le matafaga o le faletalimalo o le Sheraton Aggies Resort i Mulifanua ma le faamoemoe e faamae‘a i gataifale o Salelologa.
O le itula e 6 i le taeao na fuafua e amata ai le tuuga i le taeao o le Aso Faraile na tea nei peitai o le malosi o galu na toe tuu ai i tua i le ‘afa itula le faamoemoe.
O le ‘afa la o le ono (6.30am) na amata ai loa le tuuga ma o se taumafaiga na toatele lava le mamalu o le atunuu na agai ane e fia molimauina ma o le toatele lava na auai i lenei tausinioga o tagata mai i Niu Sila. E toatasi lava le tamaitai mai i Ausetalia na mafai ona aau.
E aofia ai foi i le ‘au aau lenei se tina e 60 tausaga le matua ae na ia ta‘ua ua tele tausaga o tausinio i tuuga aau i totonu o Niu Sila ma o ia ma lona aiga e tele lava tauvaga faapea ua aofia ai ma le faamoemoe ia siisii pea le malosi e faatino ai ia ituaiga taaloga ma ia vave le taimi e faatino ai.
Faaalia le faafetai o Afoa Seti Afoa, le Faatonu o taaloga faavaomalo i le mafai e nei tagata ona agai mai i Samoa e tausinio ma tagatānuu o Samoa i nei taaloga ma e ui o loo siomia Samoa e le sami e lē toatele ni tagata o le atunuu e faia lenei taaloga i se auala faatauvaga.
O le ‘au aau a Samoa na auai i le tuuga, o ‘au e lua o le Team Savaii ma le Team Samoa ma e fai lava ma fesuiai sui aau i le agai atu ai i Upolu mo Savaii. E lē pei o i latou mai i Niu Sila ma le tamaitai Ausetalia na manino lava o o latou lava taimi taitoatasi na ave i ai le faamuamua i lenei tuuga.
Faaalia e Afoa na taumafai lava ina ia agai sa‘o ane le ‘au aau i Salelologa mo le faatiniga o le faamoemoe peitai na faigata le tau faatonutonu ai o le itu e agai i ai le ‘au aau ona o le malosi o le galu ma na iu ai lava ina faatini i gataifale o le afioaga o Salelavalu. Ua umi atu lea nai i lo le auala na fuafua e agai i ai le au fe‘ausi.
E 22.3 kilomita le umi o le fe‘ausiga ma o le alii Niu Sila na uluai sopoia le tini o le alii e suafa ia Philip Ryan mai Niu Sila o ia lea na siamupini i lea tuuga, na ia paia le tini i le umi e 5 itula, 3 minute ma le 15 sekone.
O se fiafiaga foi i lea taulealea ona ua mafai ona ia ausia lea foi mamao ma o le a faaopoopo foi i le talafaasolopito o lona olaga, aemaise ai o lona ola taalo.
Na tulaga lua le tamaitai ia Abby Armstrong o Niu Sila foi i le umi e 6 itula ma le 30 minute na aau ai i Savaii.
O le tina 60 tausaga le matua, Browen Burmester ma o ia foi o le sui tauva pito i matua o lenei tausinioga, na tulaga tolu ma e 8 itula ma le 5minute na aau ai o ia seia taunuu i le tini.
Ae o le sui e toatasi mai Ausetalia, le tamaitai o Kate Sinclair na tulaga fā, lea na mafai ona ia taunuu i le tini i le umi e 8 itula ma le 20 minute.
O ‘au a Samoa ia na fesuiai tagata aau i le faagasologa o le tuuga na tulaga muamua le ‘au mai i Savaii i le valu itula (8) na aau ai ae tulaga lua le au a Upolu e 8 itula ma minute e 20 na ausia ai le umi faatulagaina o le tuuga.
O le faafetai ona e ui i le malosi o galu ma tafefea ai le ‘au aau i Salelavalu, ae e leai ma se tasi na lamatia ai se soifua ma mafai ona tini uma i le taunuuga o lenei tuuga.
