Oloo ua faagasolo nei se polokalame mo tamā ale Ekalesia Assembly of God uma i Aukilani ua faaigoaina o atalii ole tupu poo atalii ole Atua.
O lenei faamoemoe ua tuufaatasia ma taulamua ai le komiti faafoe a susuga i faafeagaiga ina ia mafai ona tuufaatasia le tino o Keriso e faasoa ma talatalanoa ile afioga ale Atua, faatasi ai male agaga maualuga ina ia maua nisi atalii ole tupu poo nisi e fausia le malo ole tupu (Atua).
E lē gata i lea, ia mafai ona maua le masaniga faifai pea a tamā o Ekalesia taitasi ma susuga i faafeagaiga auā ole tele o ekalesia e lei masani isi tamā i isi faifeau, ma ole manulauti lea ua taumafai e momoli pea i loto o tamā poo atalii ole Atua, o i latou e tafe mai ai manuia o aiga, nuu ma Ekalesia.
Ole taeao ole Aso Toonai 24 o Setema na toe tumutumu ai le malumalu ole Ekalesia ole Good News i Penrose i susuga i faafeagaiga aemaise o tamā o ekalesia eseese i Aukilani, e toe faaauauina lea polokalame matagofie mo tamā uma, ma ole lona lua ai lea o polokalame o lenei tausaga talu ona amataina lenei faamoemoe.
O siufofoga mālie e pei oni agelu ale aufaipese ale Ekalesia ole Good News i Penrose na pesepese ile amataina ole sauniga a‘o amata gasolosolo atu atalii ole tupu. Ole mafutaga a tamā ale Good News i Penrose na latou uluai tatalaina le polokalame i lea taeao ile latou faaevagelia ma amata ai le viiga.
Ole susuga ile faafeagaiga ia Faapaia Tuigamala, ole faifeau ole Good News na taitaiina le viiga ae ole susuga ile faafeagaiga ia Puleisea mai le Ekalesia ole AOG i Papakura na tatalo ile faapaiaina ole taulaga.
Ole upu faauuina ale Atua na fofogaina lea ele susuga ile taitai aoao ole Assembly of God i Niu Sila ia Ailaulau Faletutulu ma oloo faifeau nei ile AOG i Napier. O upu na faamamafa iai le saunoaga ale taitai, e faapea, “Ole tamā e mata‘u ile Atua e lē gata e manuia le tamā, e manuia le tina ae faapea foi ile fanau, auā o lana avā e fua tele mai e pei ole vine ae o lana fanau e vagavagaia lau lao‘ai.
Ole matagofie ole faamanatu male fafagu ale susuga ile taitai sa taitoalua lea ma faaevagelia a tamā mai Ekalesia taitasi na tapenaina auā lava le lima taitaiina o tamā i totonu o lenei faamoemoe.
Ua faaiu ai foi ii polokalame a atalii ole tupu i lenei tausaga male faamoemoe ile alofa ole Atua ile tausaga fou ole a toe amataina ai isi polokalame.
Ose tasi vaega tāua o lenei faamoemoe ole silasila mamao lea ole komiti faafoe ise hall tele ale ekalesia e fausia i Aukilani e tapuvaetasi ai ana galuegafai aemaise o ana fonotaga e pei ona masani ai i tausaga taitasi.
Ole tausaga ua mavae na amata mea ai le mafutaga a tina ua faaigoaina o afafine ole tupu ae o lenei tausaga ua soosoo atu ai le tau‘au o tamā ina ia tuufaatasia le tino o Keriso. O taulaga ole a maua i nei polokalame ua faaagaga lea mole manaoga ole ekalesia mo sona fale tele.
