Ua feagai le galuega a tusitala o le sailia o faamatalaga o mataupu eseese e lipotia i leoleo ma ni tulaga faigata o le maua tonu o faamatalaga sa’o mo le faasalalauina ona ua le mautonu poo ai e maua mai ai faamatalaga.
Sa iai le sooupu o le matagaluega sa fesootai iai ma maua ai faamatalaga peitai o le taimi nei ua le toe iai lea leoleo sinia i le faia o le galuega a le sooupu, ae ua ave uma fesili a tusitala i le failautusi a le Komesina.
Na saili atu i le Aso Tofi ma le Aso Faraile ua mavae le failautusi mo le ave iai o fesili peitai e lei maua ona o loo alu i isi galuega.
Na faaalia e se alii leoleo e ese le Malu o le Malo ua ave iai fesili ae avatu le numela o le telefoni e valaau mai ai lea alii leoleo.
E manava galuega o le Aso Faraile ua mavae e lei valaau mai se isi. O le tuuina atu e leoleo o faamatalaga i suesuega o loo faia faasaga i ni matagaluega e tolu a le Malo ona o tuuaiga o le faaaoga sese o tupe, faapea le suesuega o faiga faaalatua faasaga i le Ofisa Sili o le Matagaluega o Galuega a le Malo, ua faaalia ai e se alii leoleo sinia ua upuia ma lafo atu ai ni faasea mai le Malo pe aisea ua latou faailoa ai i le aufaasalalau ma tusitala faamatalaga o suesuega. “O le tulaga lena lea ua iai ma ua faaeteete foi se matou tala e toe fai ona ua fautuaina foi e le pulega ia aua nei toe soona faailoaina faamatalaga o suesuega o loo faia”.
O le faamatalaga lea a se molimau faatuatuaina mai le ofisa o leoleo i Apia ina ua fesootai atu iai. Ua faaalia foi e le molimau e lei mautu poo ai o le a tuu iai le galuega o le sooupu mo le tuuina atu o faamatalaga mo le silafia e le atunuu o suesuega i soligatulafono e tutupu ma aliali mai aemaise lava o ni mataupu maaleale e lipoti atu i leoleo ae o loo tuliloa ai e le vasega o tusitala mo a latou lipoti e faasalalau.
O le suesuega a leoleo i le sailia o tagata o loo i tua o le fesootaiga o Ole Palemia poo Olp, ua faaalia e se molimau mai le ofisa o leoleo ua iai se lisi o suafa o tagata ua tuuina atu, o i latou ia ua masalomia.
O suafa o ni tagata se toalua na faailoa e le Palemia i se talanoaga ma le vaega faasalalau tala o le Talamua, peitai ua faailoa mai e le molimau e faigata ona faamauina o se vaega o mau a leoleo suafa ua tuuina atu ona e faigata ona talitonuina o tagata tonu ia o loo i totonu o lea fesootaiga.
O faamatalaga mai leoleo ia latou suesuega i le mataupu lenei e le o mafai ona faailoa lautele seia vagana taimi e faatalanoa ai le taitai o le Malo ona faatoa aliali lea o ni faamatalaga i le suesuega o loo faia.
E aliali mai ai ua na o le Minisita o Leoleo o loo matala ai lona faitotoa e faasalalau ai faamatalaga i galuega o loo faia e leoleo.
