E lei tuumāmāina e Brisbane le taunuu mai o tama sasa‘o o Tofiga ma Ete, ma na muliga foi le faataliga o Michael Jackson i ana koniseti masani a o lei maliu, i le lolofi atu o tagata i le fia maimoa i aitu ta‘uta‘ua o loo faasavali solo a la koniseti i le lalolagi atoa.
E lē mafai ona faatusalia le tumu o lea faamoemoe.
O isi tagata ua tauāu ina pauu ai le isi ta‘i 7 kilo i le mamao o paka sa paka ai taavale ina ua lē ofi kapaka i le fatu o le taulaga o Brisbane.
Ua fai a sina leva o tatali si o matou pitonuu i le taimi foi e oo mai ai le faasologa poo le aso ua atofaina i lenei tausaga, le aso 26 o Iuni.
E ova atu i le afe ma ona tupu pe sili atu foi tagata sa maimoaina lea faafiafiaga iloga ma le logomalie. E pei foi ona lausilafia e lei mamao atu ona maimoa i le la DVD lauiloa faato‘ā mae‘a atu, ua faaigoaina o le Prettyful Woman, ae lē mafai lava ona mavae le matagofie ma le fia faafofoga pea aemaise le fia sosoo pea o le ata i uiga mālie ma le onomea o lea foi aualii poo ia alo logologoā o Samoa, susuga ia Tofiga ma Ete. Na amataina i le itula e 8 i le afiafi ae masalo na faatalitali mai tagata e lei tāina le 4 i le afiafi o le Aso Toonai.
O le itu e mālie tele ai e leai se isi na ona iloa le taavalevale a le isi toeaina ina ua laalaa mai le tama o Tofiga ma ona laei e pei ua e tagai ia Elvis ae o le vavai mai la ma lona tino i le faatinoina o ana pese mālie ae faapa‘ō mai e Ete le kitara.
O le mea mālie e uma a le taamilomilo a Tofiga ae o la lava e tatagi le ‘ata a si toeaina lea.
Ai si toeaina o lona taimi muamua lea i faafiafiaga a Tofiga ma Ete ma na faapea lava ia o lana DVD i lona maota la e ata nee ai.
Ou te talitonu o le isi tagata sa matuai ‘ata ee ia Tofiga ma Ete, na moe faasasa‘o ai lava i le Aso Sa e leai ma se manatua o le lotu.
Sa‘o ai Petelo “Ai ana faapea uma se tumu o se lotu kafefe ua aveolaina i le lagi.”
E fai foi o le lagolago a tagata Samoa, ae o isi atumotu o le Pasefika e pei o Tonga, Rarotonga, Toelau, Niue, Maori ma si atunuu pei o Fiti lea na tau lavevea ina ua afea e le isi tala mālie e iai tagata mai se isi atumotu e ta‘i 8 futu le uumi o vae se‘i tulou.
O le isi itu na mataina i lea po, ona e lē gata o ē matutua, le tupulaga tolu ma le fa ae o le faatumulia i tupulaga talavou faapea alo ma fanau laiti ua fetaui lelei ma le tuuaga o aoga a Brisbane.
